TUPU nabaraka bo nakuasa
29
Dade i Daud.
Toiyamo TUPU,
hee komiu toponturo ri suruga,
toiyamo kagaya bo kuasaNa.
2 Toiyamo sanga nTUPU anu nipakaoge,
sombamo Ia ante mompake pakea nasipato!
3 Alatala naoge,
tempo Ia notesa,
suaraNa eva guru kede ri bavo ntasi luo,
suaraNa nelompa ri bavo nu uve oge.
4 Suara nTUPU nakuasa mpuu.
Suara nTUPU nompaisani kaoge nTUPU.
5 Suara nTUPU nokotosi kayu ara,
bo ledo aga nikotosiNa tapi nidungganakasiNa kayu ara Libanon.a
6 Ia nompopogoya bulu ri Libanon mpo ana nu japi nekavantu-vantu,
bo nompopogoya Bulu Siryon mpo ana nu bengga nekavantu-vantu.
7 Suara nTUPU eva kila norea.
8 Suara nTUPU nompoporii karava bai,
TUPU nompopolete karava bai Kadesh.
9 Tempo TUPU nompopaepe suaraNa,
rusa-rusa natiana noana,
bo kayu-kayu rakayu nasou pura tavana.
Pura-pura tona riara Banua TUPU novoo nombatoiya Ia.
10 TUPU nombakuasai uve oge,
TUPU nakuasa nomparenta sampe kasae-saena.
11 Damo TUPU mombadekei karoso ka todeaNa,
bo mombadekei katuvu matinonto ka ira.