Posambaya nekitulungi
28
Dade i Daud.
O PUE,
yaku nekakai nte Komiu!
Epemo posambayaku,
apa Komiu topombasaliku yaku.
Ane ledo rapesanakaMiu yaku,
domo ria panjarumakaku,
yaku masimbayu nte tona namatemo.
2 Petalingaimo posambayaku
ane yaku mantingayo BanuaMiu bo manganggataka paleku mekakai mekitulungi.
3 Nee rahuku yaku mosinggani nte tona ledo nangoseaka parenta nTupu,
bo tona nokainggu nadaa.
Ira aga nabelo ri sumba
tapi rarara navau.
4 Hukumo ira
sabana pokainggu nadaa nipoviara.
Hukumo ira nangoseaka pokainggura;
dekeimo pehuku masipato ka ira.
5 Domo nipeilira povia nTUPU,
bara anu nipovia mpale nTUPU.
Jadi TUPU mombahuku ira,
bo rapakaropuNa ira sampe kasae-saena.
6 Ratoiyamo TUPU,
sabana niepeNamo pekakaiku.
7 TUPU nombalenduti bo nombasaliku yaku,
kuparasaya Ia.
Ia nombatulungi yaku bo nompakadamba raraku,
yaku mombatoiya Ia ante dade posukuru.
8 TUPU nombadekei karoso ka todeaNa,
Ia nombasaliku bo nompakasalama magau pompelisiNa.
9 O PUE,
pakasalama todeaMiu,
bo poporasi ira.
Poevumo bo jagaimo ira sampe ri kasae-saena.