Sambaya petoiya
27
Dade i Daud.
TUPU nompakareme dala nggatuvuku bo nompakasalama yaku,
ledo ria kupokaeka.
TUPU petidomboku,
ledo maeka yaku.
2 Ane tona nadaa madota mompatesi yaku,
aga ira mboto matepasunu bo madungga.
3 Naupa yaku rapatiku ntantara dea,
ledo maeka yaku.
Naupa posieva mbaso majadi,
yaku batena nanjarumaka TUPU.
4 Aga sangaya kuperapi nte TUPU,
aga hitumo pompokonoku:
monturo ri banua nTUPU sampe kaupu nggatuvuku,
ala mombarasai kabeloNa
bo merapi pekeniakaNa.
5 TUPU nombalenduti yaku tempo yaku nanggava silaka;
Ia nombajagai yaku riara BanuaNa,
bo nanggeni yaku matuvu matinonto.
6 Hitupa pura-pura bali nompatiku yaku,
tapi yaku padagi.
Jadi kudekei pesomba posukuruku ri BanuaNa,
bo manggati ante damba raraku.
Yaku modade mombatoiya TUPU.
7 O PUE,
epemo pekakaiku nte Komiu.
Poasimo yaku bo pesanakamo yaku!
8 Komiu nanguli “Kamaimo mombasomba Yaku.”
Yaku mesana,
“Yaku mombasomba Komiu,
PUE.”
9 O Alatala,
tompompakasalama yaku!
Nee rapetabunikaMiu yaku.
Nee marau bo nee rapoaraMiu yaku,
batuaMiu,
Komiumo bate-batena nombatulungi yaku,
nemo ratedaka yaku bo nee rapalaisi yaku.
10 Naupa tina-tuamaku mompalaisi yaku,
tapi Alatala batena mompeili yaku.
11 O PUE,
popasani ka yaku dotaMiu.
Keniaka yaku ri dala nggatuvu nanoa,
apa nadea mpuu baliku.
12 Nemo rapalamba baliku mompakadupa niara nadaa ka yaku.
Ira nasese nte yaku bo nombadavai yaku
13 Nisaniku yaku mombarasai kabelo nTUPU
riara nggatuvuku ri dunia hitu.
14 Popeamo TUPU mokainggu!
Pakaroso bo pakaroomo raramu,
popeamo Ia mokainggu!