Posambaya ala rapakanoa riara potangara
26
Dade i Daud.
O PUE,
popakitamo yaku ledo nasala,
sabana yaku natuvu ante rara mpuu-mpuu nagasa.
Yaku nanjarumaka Komiu,
bo raraku ledo ria nonggai-nggai.
2 O PUE,
paresa bo ujimo yaku,
paresamo raraku bo pekiriku.
3 Yaku batena nantora toveMiu anu ledo naupu-upu,
bo yaku batena natutu nte Komiu.
4 Yaku ledo madota masiromu singgani ante topebagiu,
bo ledo mosimporoa nte tona nabelo ri sumba.
5 Kupovuu mata kasiromu ntona nokainggu nadaa,
bo kukavaoni tona ledo nomparasaya Tupu.
6 O PUE,
kutoposi paleku tandana ledo nasala,
pade molipa molintiku lanta pesomba ka Komiu,
7 bo modadeka dade posukuru ante suara mamangga,
mompatolele pokaingguMiu nabaraka.
8 O PUE,
yaku nompotove banuaMiu,
apa ri sia nikita ntona kaogeMiu.
9 Nee rapatesi yaku mosinggani nte tona nadosa,
bo nee mombalelaka nosaku mosinggani nte topepatesi.
10 Ira ledo nenonto-nonto nokainggu nadaa,
bo nasaro nantarima doi mate.
11 Tapi yaku natuvu ante rara nagasa,
poasimo bo kabasakamo yaku.
12 Natinontomo yaku dako ri pura-pura kasusa,
yaku mombatoiya TUPU riara nggasiromu ntodeaNa.