Posambaya mekikeniaka bo mekijagai
25
Dade i Daud.
O PUE,
aga nte Komiu kusovadakaka posambayaku.
2 O Alatala nisombaku,
Komiu nisarumakaku!
Nee rapalamba yaku rapakaeya,
bo rapovoo-vooka nu baliku.
3 Tona nanjarumaka Komiu ledo rapakaeya.
Tapi tona rapakaeya iamo tona anu nesapuaka nau ledo ria sabana.
4 O PUE,
popakita dotaMiu ka yaku,
popaisani nuapa masipato kupovia.
5 Patuduki bo keniaka yaku matuvu mangoseka dotaMiu,
sabana Komiumo Alatala topompakasalama yaku.
Bo Komiu batena nisarumakaku.
6 O PUE,
toramo kabelo bo toveMiu
nipopakitaMiu ka todeaMiu dako ri nggauluname.
7 Tumo ratoraMiu dosa-dosa nipoviaku tempo yaku da namuda.
Tapi toramo yaku nangoseaka toveMiu ledoria kaupu-upuna,
sabana kabelo raraMiu.
8 TUPU nabelo bo nanoa,
Jadi Ia nombatuduaka dala ka tona nasalandala.
9 TUPU nanggeniaka tona naede rarana movia anu nabelo,
bo nompatuduki dotaNa ka ira.
10 Tove nTUPU ledo naupu-upu.
Ia namala raparasaya bo rasarumaka ntona
anu batena nangoseaka pojanji bo parentaNa.
11 PUE,
nipokonoMiu neampungi,
jadi ampungimo yaku apa nambaso mpuu salahku.
12 TUPU nompatuduki tona naeka nte Ia,
ala rasanira dala nakana raosera.
13 Ira kana batena matuvu masana.
Mulira rakaboli nu tana ntotuara.
14 TUPU novega rapa nte tona naeka nte Ia,
bo nompakalanto isi pojanjiNa ka ira.
15 Yaku batena nanjarumaka petulungi nTUPU,
sabana Ia nompakasalama yaku dako ri kasusa.
16 O PUE,
peintamo yaku bo poasimo yaku,
sabana nalino vayoku bo nandasa mpuu nirasaiku.
17 Kasusa nu raraku nantambaimo!
Kabasakamo yaku dako ri kasusa hitu.
18 Porarantaikamo kandasa bo kasusaku,
bo ampungimo pura-pura dosaku.
19 Peintamo nadea mpuu baliku.
Nipovuu matara ntoto yaku.
20 Jagaimo katuvuku bo pakasalama yaku,
ala nemo maeya yaku,
sabana yaku netalendu nte Komiu.
21 O PUE,
keniakamo yaku matuvu manoa bo magasa raraku,
sabana yaku nanjarumaka Komiu.
22 O Alatala,
kabasakamo todeaMiu toIsrael
dako ri pura-pura kasusara!