Posambaya mekipakabelo
41
Dade i Daud nipovia ka pakeni ntopodade.
2 Masana mpuu tona najoi rarana mbatulungi tona napakasi;
TUPU mombatulungi tona najoi rarana haitu tempo ia manggava kasusa.
3 TUPU mompakatinonto bo mompakasana katuvuna ri dunia,
bo ia ledo rapalamba nTUPU rapongeika balina.
4 TUPU mombatulungi ia tempo nadua,
bo mompakabelo duana.
5 Tapi ane yaku,
aga hitu nipoviaku,
yaku nanguli,
“O PUE,
nadosamo yaku ri ngayoMiu,
poasimo bo pakabelomo yaku!”
6 Baliku nadaa tesana nanguli yaku,
ira nanguli,
“Maipiamo ia mamate bo sangana rakalingasi ntona?”
7 Ira nakava nompeinta yaku nadua
ledo nte mpuu-mpuu rarara.
Ira aga nompasiromu tesa nadaa anu najadi ri karoku
bo tesa haitu nipatolelera.
8 Pura-pura tona nompovuu mata yaku nanggalivaya nombatesa yaku;
ira nonia madaa ka yaku.
9 Ira nanguli yaku ivei,
“Nantamo mpuu duana,
domo rapakulena matuvu.”
10 Nau damo vega rapa niparasayaku anu nangande singgani nte yaku,
nipobalunamo yaku.
11 O PUE,
poasimo yaku,
bo pakabelomo duaku,
ala mamala kubalasi kadaa nu baliku.
12 Ane baliku ledo mompakule mombadagi yaku,
kusanimo yaku niposana raraMiu.
13 Komiu nombatulungi yaku sabana kanoa nu raraku,
bo mompakaroso pomparasayaku Komiu sampe ri kasae-saena.
14 Toiyamo TUPU,
Alatala nisomba ntoIsrael!
Toiyamo Ia mompamula eo hitu sampe kasae-saena!
Kambou majadimo ivesia.
Amin!