BUKU KARANDUANA:
DADE I DAUD 42-72
Posambaya ntona ri tana pompali
42
Dade nipovia ka pakeni ntopodade.
Dade pepatuduki ntoKorah.
2 O Alatala,
eva rusa nompolentora manginu uve binangga,
ivesia muni raraku nalentora mombasomba Komiu.
3 Yaku nalentora nte Alatala,
Alatala anu natuvu sampe ri kasae-saena.
Maipiamo yaku mamala hau mombasomba Ia ri banuaNa?
4 Nabuku mpuu raraku,
eo bongi yaku notumangi,
apa njumaeo baliku nompongeika yaku.
Ira nanguli,
“Umbamo tano Alatala nisombamu?”
5 Nabuku mpuu raraku nantora tempo nggaulu,
tempo yaku hau ri Banua nu Alatala,
nosinggani-nggani nte todea nadamba nodadeka dade posukuru.
Yaku nolipa nompakeni ira
novoo-voo bo nadamba nodadeka dade petoiya.
6 Ledo ria gunana mabuku bo mapari raraku,
aginapa yaku manjarumaka Alatala.
Apa yaku mosukuru vai nte Alatala nisombaku,
Topompakasalama yaku.
7-8 Ri tana pompali hitu naupumo raraku,
sabana haitu nitoraku TUPU.
Raraku nandasa nikeniaka buku raraku,
kapari rara nanggava yaku
nasimbayu eva karimboso uve saonjo binangga Yordan lako ri Bulu Hermon bo Bulu Mizar.
9 Eona nipopakita nTUPU toveNa anu ledo ria kaupu-upuna,
ala bongina yaku mamala modadeka dade posambaya
ka Alatala,
puna nggatuvuku.
10 Yaku manguli ka Alatala anu nombasaliku yaku,
“Nakuya nikalingasiMiu yaku?
Nakuya yaku kana nombarasai kandasa,
sabana nipandasa nu baliku?”
11 Nasusa pekiriku sabana pesalai nu baliku.
Ira nekutana njuu,
“Umbamo tano Alatala nisombamu?”
12 Ledo ria gunana mabuku bo mapari raraku,
aginapa yaku manjarumaka Alatala.
Apa yaku mosukuru vai nte Alatala nisombaku,
Topompakasalama yaku.