Posambaya ri tana pompali
Umpu nu Mazmur 42
43
O Alatala,
salikumo yaku riara mpotangara mantingayo tona anu ledo nomparasaya Komiu.
Popakitamo yaku ledo nasala.
Kabasakamo yaku dako nte topebagiu bo tona nokainggu natenggo.
2 Komiumo Alatala anu nombasaliku yaku.
Nirasaiku eva nipalaisiMiumo yaku.
Nasusa njuu nirasaiku,
sabana nipandasa nu bali-baliku.
3 Pakalanto pekiriku bo tulungiMiu njuu yaku,
ala haitu manggeniaka yaku manjili hau ri Bulu Sion,
ri bulu nipelisiMiu raponturoMiu.
4 Jadi hamai ri lanta pesomba,
yaku mantingayo Alatala,
puna nu kasana bo kadamba raraku.
O Alatala nisombaku,
yaku modade bo mokacapi,
mombatoiya Komiu.
5 Ledo ria gunana mabuku bo mapari raraku,
aginapa yaku manjarumaka Alatala.
Apa yaku mosukuru vai nte Alatala nisombaku,
Topompakasalama yaku.