Posambaya ntodea anu nipandasa
44
Dade nipovia ka pakeni ntopodade dako nte toKorah.
Dade pepatuduki.
2 O Alatala,
niepe kami mbotomo
tutura nitesaki ntotua kami nggaulu,
kabaraka nipoviaMiu ri tempo nggaulu.
3 Ante kuasaMiu mboto,
Komiu nompopalai todea-todea nu ngata
ala todeaMiu maroo ri ngatara.
Komiu nombahuku todea-todea nu ngata haitu
tapi Komiu nompakasana katuvu ntodeaMiu.
4 Tana nikaroora haitu ledo nipemalara nte guma,
bo ledo nte karosora mboto sampe ira padagi.
Tapi tana haitu nipemalara ante kuasaMiu,
karosoMiu bo pomporoaMiu ira,
sabana ira todea niposana raraMiu.
5 Komiumo Magau bo Alatala nisombaku.
Komiu nompakatantu kami todeaMiu,
muli i Yakub,
padagi.
6 Ante kuasaMiu kami nombadagi bali kami,
bo ante petulungiMiu kami nombaropusi tona nombasuu kami.
7 Jadi yaku ledo nanjarumaka katada mata panaku,
nau gumaku ledo nompakule mompakasalama yaku.
8 Tapi Komiumo nombatulungi kami nombadagi topangeva kami,
bo tona nompovuu mata kami nidagimo sampe naeya matara.
9 Jadi kami kana masaro mopakaoge bo mombatoiya Komiu,
bo mosukuru nte Komiu sampe kasae-saena.
Jedaa
10 Tapi hitupa domo nipeiliMiu kami
bo nipalambaMiumo kami nipakaeya.
Komiu domo nomporoa tantara-tantara kami riara mposieva.
11 NipalambaMiumo kami nompalaika bali kami,
bo niagosira kakalumana kami.
12 NipalambaMiumo kami nipatesi eva bimba nisambale,
bo nasimpotare ri tatanga todea-todea ngata ntanina.
13 NipobalusiMiu todeaMiu najadi batua,
ante ali ledo masipato.
14 Kami nipajadiMiu vua ntesa ntona nosadoyata nte kami.
Ira nompongeika bo nompakaeya kami.
15 Kami nipajadiMiu anu nipongeika nu todea-todea ngata.
Ira nombalito-lito balenggara nombasalai kami.
16 Njumaeo yaku nisalai,
nombarasai ea mata,
17 sabana nangepe pepongeika bo pesalai ntona
ri ngayo ntona nompovuu mata kami.
18 Pura-pura haitu najadi ri karo kami,
tapi kami ledo nombakalingasi Komiu,
bara nombalumpaiki pojanjiMiu nte kami.
19 Kami ledo nombasapuaka Komiu,
bo parentaMiu kana nioseaka kami.
20 Naupa ivesia,
Komiu nompandasa kami ri tatanga binata nasingi,
bo nompoponturo kami riara landa kamate.
21 O Alatala nisomba kami,
ane rapana kami domo nombasomba Komiu,
bo aga merapi nte tupu ntanina,
22 natantu rasaniMiu,
sabana Komiu nangisani isi mpekiri kami.
23 Eo bongi naria tona madota mompatesi kami,
sabana kami nomparasaya Komiu.
Kami nipasimbayu mpo bimba rasambale.
24 O Pue,
pembangumo!
Nakuya Komiu aga naturu?
Pembangumo!
Nee rapoara kami sampe kasaena.
25 Nakuya Komiu aga nepetabunika,
bo nikalingasiMiu tempo kandasa bo pepandasa nanggava kami?
26 Kami nadunggamo ri tana,
nipaodo ri bavo nu sovu sabana nidagi.
27 O Pue,
kakavamo mantulungi kami,
bo kabasakamo kami
sabana toveMiu ledo ria kaupu-upuna.