Dade ntoIsrael tempo poboti magau
45
Dade mpetupu nitulisi ntoKorah mompatuduki todea nu Alatala.
Nipovia ka pakeni ntopodade.
Dade hitu kana rapodadeka ante sanga dade “Bunga bakung.”
Dade tove.
2 Tesa-tesa nagaya hitu nesuvu dako riara ntaiku,
kupodadeka tindua ka magau.
Yaku nasadiamo mombasovadaka tindua
eva tona natau novia dade.
3 O magau,
komiu nagayapa pade pura-pura manusia ntanina,
komiu natau notesa bo tesamiu nalusu.
Sabana haitu komiu njuu-njuu nipoporasi nu Alatala.
4 He komiu tadulako anu naroso bo nabia,
takamo gumamiu!
Komiumo magau nipakaoge.
5 Ante kaogemiu,
koi evamo balimiu!
Salikumo anu nakana,
nalusu bo nanoa.
Komiu novia anu nipokumaaka,
sabana komiu naroso.
6 Mata panamiu natada melosa ri sule nu balimiu,
todea-todea nu ngata nidagimiu.
7 Alatala nombadekei ka komiu kuasa moparenta
sampe kasae-saenaa,
bo komiu momparenta todeamiu ante rara nanoa.
8 Komiu nompotove anu nanoa bo nipovuu matamiu anu nadaa.
Sabana haitu,
Alatala nisombamiu nipelisiNamo komiu,
bo nipakasananapa komiu pade magau-magau ntanina.
9 Pakeamiu navangi soana,
nesoa dama navangi,
gaharu bo lemodaru.
Iko nantalingai oni nu kacapi,
ri banua kamagauamu anu nirambaki ante ngisiasu gajah.
10 Dako ri pura-pura mombine nibila ri kamagauamu,
naria mombine-mombine ana nu magau.
Ri sabingga pangganamu neangga boti mombine
ante ramba-ramba bulava ledo ria galona.
11 Hee,
boti mombine,
epemo tesaku,
kalingasimo todeamu bo sampesuvumu.
12 Kagayamu nompakatekende rara nu magau,
bilamo ia,
sabana ia magaumu.
13 ToTirus manggeni pesomba ka iko;
Tona nakalumana mompasimbuku mekou nte iko.
14-15 Nagaya mpuu boti mombine,
bajuna nisuji nte bana bulava.
Ia nesuamo riara banua kamagaua,
ia nikeni ante pakea nirambaki hau nte magau.
Roa-roana randaa nanggeni ia,
randaa gahaitu muni mantingayo magau.
16 Ira novoo-voo nadamba
tempo nikeni mesua ri banua kamagaua!
17 O magauku,
komiu manggava ana langgai madea
mombasambei totuara nggaulu majadi magau.
Ira rapajadmiu topomparenta
ri njumangu dunia.
18 Ante dade hitu kupatolele poviamiu nambaso sampe ri muli nu muli.
Todea-todea nu ngata mantoiya komiu sampe kasae-saena.