Alatala nomporoa bo nombatulungi kita
46
Dade nipovia ntoKorah ka topanggeni podade.
Nangoseaka dade nosanga “Alamot”.
2 Alatala nombasaliku bo nompakaroso kita.
Ia naria njuu nombatulungi kita tempo kita nanggava kasusa.
3 Haitu sabana kita ledo naeka.
Nau dunia mabali,
nau bulu-bulu mogoya bo manavu rantasi,
4 nau uve ntasi manggaremba bo mobalumba mbaso,
bo morii bulu rarumpana,
ledo maeka kita.
Jedaa
5 Ri ngata pombasomba Alatala naria [katuvua,
anu nirapaka] uve binangga noili.
Binangga haitu nompakadamba rara ntodea ngata haitu.
Ngata haitumo ponturo nu Alatala anu neliu kakuasaNa.
6 Alatala naria ri sia,
jadi ngata haitu ledo magero,
Ia nombatulungi todeana tempo nebonda eo.
7 Alatala nompakagado todea-todea ngata bo nompakagero kamagaua-kamagaua.
Alatala nompopaepe suaraNa bo dunia nagero.
8 TUPU Topompajadi dunia bo isina nomporoa kita,
Alatala anu nisomba i Yakub,
eva bente naroso nombalenduti kita.
Jedaa
9 Peintamo anu nipovia nTUPU,
Ia novia anu nipokumaaka ri dunia.
10 Alatala nompopetaa posieva ri njumangu dunia.
Ia nombakotosi pana,
nompakangguu tavala,
bo kaliavo-kaliavo nipalabusiNa.
11 Nangulimo Ia,
“Petaamo mosieva.
Peintamo!
Yakumo hii Alatala.
Yaku ratoiya ri tatanga ntodea-ntodea ngata,
bo rapakaoge ntodea ri njumangu dunia.”
12 TUPU Topompajadi dunia bo isina nomporoa kita.
Alatala anu nisomba i Yakub,
eva bente naroso nombalenduti kita.
Jedaa