Alatala, Magau nakuasa ri njumangu dunia
47
Dade nipovia ntoKorah ka pakeni ntopodade.
2 He todea-todea ngata,
posapa palemo nte damba rara!
Povoo-voomo mantoiya Alatala!
3 Sabana TUPU Toneliu kakuasaNa mpuu-mpuu nompopokumaa rara.
Ia Magau nakuasa nombakuasai njumangu dunia.
4 Ia nompopompakule kita nombadagi todea-todea ngata,
nompajadi kita mombakuasai todea-todea ntanina.
5 Ia nompelisi tana rakaroota,
anu maboli ka muli-mulita.
Haitu nompakadamba rara ntodea nipotoveNa.
Jedaa
6 Tempo TUPU Alatala hau monturo ri ponturo pomparentaNa,
tona novoo nadamba bo nompopomoni tabue.
7 Podadekamo dade petoiya ka Alatala.
Podadekamo dade ka Alatala,
Iamo Magauta!
8 Alatala Magau ri njumangu dunia,
toiyamo Ia ante dade pepatuduki.
9 Alatala nonturo ri ponturo pomparentaNa anu nitaniakaNa ka Ia;
Iamo Magau anu nomparenta todea-todea ngata.
10 Pakeni ntodea-ntodea ngata nasiromu
najadi todea nu Alatala anu nisomba i Abraham.
Sabana Alatala nakuasapa pade pakeni-pakeni ntodea ngata ri dunia,
bo Ia mpuu-mpuu naoge bo nakuasa.