Sion, ngata nu Alatala
48
Dade nipovia ntoKorah.
2 Naoge mpuu TUPU
bo tona mpuu-mpuu nombatoiya Ia,
ri ngata nu Alatala nisombata.
3 Bulu Sion bulu nipelisi nu Alatala,
nalanga bo nagaya,
anu nompakadamba njumangu dunia.
Bulu haitu nakavao ri sabingga tasina,
haitumo ngata nu Alatala,
Magau Mbaso.
4 Alatala nonturo riara banua kamagauaNa
bo Ia mbotomo nombajagai ngata haitu.
5 Peintamo magau-magau nasiromu nompakasangu,
ira nakava mesuu.
6 Tapi nipeintarapa bulu haitu,
nokumaamo ira;
ira nagado bo nangova nte ingu rara.
7 Hamai ira nolete naeka,
ira nombarasai dua,
mpo dua nirasai mombine noana,
8 Alatala mombarupusaka ira
nasimbayu eva poiri rimboso nombarupusaka kapala ntasi Tarsisa.
9 Niepetamo anu nipovia nu Alatala,
hitupa nipeintata mbotomo,
ri ngata nTUPU Topompajadi dunia bo isina.
Ngata haitu ngata nu Alatala,
Ia mombajagai ngata haitu sampe ri kasae-saena.
Jedaa
10 O Alatala,
riara BanuaMiu
kami mantanondoaka toveMiu anu ledo ri kaupu-upuna.
11 SangaMiu natolele bo ratoiya ri njumangu dunia,
nanoa pomparentaMiu.
12 Dekeikamo todea ri ngata Sionb bo todea ngata Yehuda movoo madamba,
sabana Komiu nombahuku balira.
13 Lintiku bo pesayokimo ngata Sion
bo rekemo pelantoa pojaga.
14 Peintakamo tembona,
bo paresamo bentena,
ala mamala ratesamiu ka muli-mulimiu:
15 “Iamo Alatala nisombata sampe ri kasae-saena,
Ia manggeniaka kita sampe ri kasae-saena.”