Ledo ria gunana manjarumaka kakalumana
49
Dade dako nte toKorah.
Nipovia ka pakeni ntopodade.
2 He komiu todea-todea ngata ri njumangu dunia,
epemo!
He toponturo ri dunia,
pataamo talingamiu!
3 Nau tona biasa bara tona nalanga nturona,
nau tona napakasi,
bara tona nakalumana,
pariaramo!
4 Yaku mombasovadaka tesa noto mpekiri,
bo anu nitanondoaka mpekiriku iamo pompaha.
5 Kuparantaika petevai noto,
bo manguli batua porapaku nte mokovi kacapi.
6 Ledo kupokaeka ri tempo kasusa,
tempo yaku nipatiku kadaa nu bali-baliku.
7 Ira mai aga nanjarumaka kakalumanara,
bo aga nombaoe kadea nu mbara-mbarara.
8 Ledo ria saitoa tona namala mompakasalama karona mboto,
bara mombayari ka Alatala raposambei nyawana.
9 Nau nuapa radekeina ledo magana,
nasuli ntoto ali pombatoloki nyawana,
10 ala ia ledo mamate
tapi batena matuvu sampe ri kasae-saena.
11 Manusia kana manggita
tona nanoto pekirina mamate muni.
Ivesia muni tona nambongo bo nadoyo kana maropu singgani,
bo mbara-mbarara maboli ka tona ntanina.
12 Tona namate monturo radayo sampe ri kasae-saena;
haitumo ponturora sampe ri muli nu mulira,
naupa nggaulu nadea tanara.
13 Manusia ledo matuvu njuu,
naupa ia nakalumana ia kana mamate.
Ia kana maropu nasimbayu eva binata.
14 Ivesiamo dala nggatuvu ntona nanjarumaka karona mboto,
bo uere nggatuvu ntona aga nangoseaka tesana mboto.
Jedaa
15 Alatala nompakatantu ira mamate,
nasimbayu eva bimba.
Mpadondona ira nidagi ntona nanoa.
Ira mamate bo ratana.
Karo batara mapopo riara dayo,
ira monturo ri ponturo malaeka ntomate.
16 Tapi Alatala mompakasalama yaku dako ri kuasa kamatea,
Natantumo Ia manganggataka yaku dako hamai.
Jedaa
17 Nee makini raramu manggita tona nakalumana,
bara mbara-mbara ri banuana mantambai kadeana.
18 Apa tempo ia mamate ledo ria nuapa-nuapa mamala rakenina,
mbara-mbarana ledo rakenina hau radayo.
19 Naupa ia natuvu nasana,
bo nitoiya-toiya ntona sabana noasele katuvuna,
20 ia kana mantutuni totuana nggaulu anu nokolumo namate
hau ri ponturo nalanda sampe ri kasae-saena.
21 Naupa manusia nakalumana,
ane ledo ria pompaha,
ia kana maropu nasimbayu eva binata.