Pesomba nakana
50
Dade i Asaf.
TUPU,
Alatala nambaso kakuasaNa notesa
Ia notesa ka njumangu dunia
dako ri mpandakena sampe ri mpanauna.
2 Dako ri Sion,
ngata nagaya bo nabelo,
Alatala neumba nte reme.
3 Alatala nisombata makava mombatangara,
bo kakavaNa ledo malino,
apu novonda-vonda nokoluka Ia,
bo ri njidi nganaNa poiri rimboso.
4 Ia nombaronde langi bo tana
majadi sabi tempo Ia mombatangara todeaNa.
5 Nanguli Ia,
“Pasiromumo njumangu todea nipotoveKu,
anu nosibotusi nte Yaku,
bo botu haitu nipakaasa ante binata pesomba nisambale.”
6 Langi nompatolele Alatala nanoa nombatangara todeaNa,
sabana Alatala mboto majadi topotangara.
Jedaa
7 “Epemo,
he todeaKu,
toIsrael Yaku motesa ka komiu,
Yaku manguli kasala nipoviamiu.
Yakumo hii Alatala,
Alatala nisombamiu.
8 Yaku nombahuku komiu,
ledo sabana binata nisambale anu nipesombamiu ka yaku,
komiu batena nompalabu binata pesomba ri ngayoKu.
9 Yaku ledo noparaluu japi dako ri gimpumiu,
bara tovau dako ri lunu binata nipatuvumiu.
10 Sabana pura-pura binata rakayu,
bo nonjobu-njobu binata ri bulu,
Yaku tupuna.
11 Pura-pura tonji ri bulu,
bo pura-pura anu natuvu ra nggarava,
Yaku munimo tupuna.
12 Ane naara taiKu,
ledo paraluu Kutesa ka komiu,
sabana dunia bo isina Yaku tupuna.
13 Yaku ledo nangande bau japi,
bo ledo muni nanginu raa ntovau.
14 Posukurumo nte Yaku,
Alatala nisombamiu,
haitu majadi pesombamiu ka Yaku,
Pakadupamo janjimu nte Yaku TUPU anu Nelabi Kakuasana.
15 Pekakaimo nte Yaku ri tempo nggasusa,
Kukabasaka komiu,
bo komiu mombatoiya Yaku.”
Jedaa
16 Tapi TUPU nanguli ka tona nadaa ivei,
“Iko ledo masipato mombasovadaka tesaKu,
bo motesaki pojanjiKu.
17 Apa ledo nipokonomiu nantarima peonteakaKu
bo nipoaramiu parentaKu.
18 Ane nikitamu topangangga,
nituntunimu ia,
bo iko nosimporoa nte tona nobualo.
19 Iko nasaro notesa anu nadaa,
bo nasaro nebagiu.
20 Iko njuu-njuu nompakadaa sampesuvumu,
bo nombatunturaka sampesuvu koyo pusemu.
21 Haitumo nipoviamu,
tapi Yaku ledo notingo,
jadi nipekirimu Yaku nasimbayu nte iko.
Tapi hitupa Yaku mombasalai iko,
bo pura-pura hitu Kupakalanto ka iko.”
22 “Parantaikamo,
he komiu anu nombakalingasi Alatala;
ala nemo sampe Kupakaropu komiu,
bo ledoria topompakasalama komiu.
23 Tona nompakaoge Yaku,
nombadekei pesomba posukuru ka Yaku.
Tona natuvu nanoa rarana Kupopakita ka ia kasalama dako nte Yaku.”