Posambaya mekiampungi
51
Dade i Daud nipovia ka pakeni ntopodade
2 naliu ia nionteaka i nabi Natan sabana pokaingguna nobualo nte i Batsyeba.a
3 O Alatala,
poasimo yaku,
sabana Komiu batena nepotove.
Lalisimo dosaku sabana kaoge asi nu mataMiu.
4 Ampungimo pura-pura kasalaku;
Pakagasamo yaku dako ri pura-pura dosaku.
5 Sabana nanotomo raraku nte kasala nipoviaku;
bo dosaku nasaro nitoraku.
6 Yaku nadosamo nte Komiu,
nambaso mpuu dosaku ri ngayoMiu,
nipoviaku anu nadaa ri mataMiu.
Nanoa pobotusiMiu yaku nasala,
jadi masipato Komiu mombahuku yaku.
7 Mpuu-mpuu dako ri pompoanakame,
nadaa mamimo yaku,
yaku nadosa mamimo da riara ntai ntinaku.
8 Komiu mpuu-mpuu aga nompokono kanoa rara;
Komiu nombadika noto riara ntaiku.
9 Pakagasamo yaku dako ri dosa,
ala magasa raraku;
gasaimo yaku dako ri pura-pura pokaingguku naruto,
ala raraku mabulapa pade kapa.
10 Dekeimo yaku mangepe kareba damba,
ala raraku nipakasusaMiu,
madamba mpanjili.
11 Tumo Mutora dosaku,
tapi ampungimo yaku
bo lalisimo pura-pura salaku.
12 O Alatala,
pakagasamo raraku,
pakabarumo raraku ante dota rara maroso.
13 Nee rapopalai yaku dako ri ngayoMiu,
bo nee raala nosaMiu nagasa dako nte yaku.
14 Popeumba mpanjili damba raraku eva damba rara nirasaiku,
tempo Komiu nompakasalama yaku,
dekeimo ka yaku dota rara anu mpuu-mpuu matundu nte Komiu.
15 Jadi yaku mamala mompatuduki parentaMiu ka tona nombaliunaka parentaMiu,
ala tona novia dosa manjili mpanjili nte Komiu.
16 O Alatala topompakasalama yaku,
kabasakamo yaku dako ri dosa nompatesi tona ntanina,
jadi ante damba raraku,
kupatolele kanoaMiu.
17 O Pue,
tulungimo yaku motesa,
ala yaku ledo maupu-upu mombatoiya Komiu.
18 O Alatala,
Komiu ledo nompokono binata nisambale rapesomba ka Komiu;
naupa binata rapalabu kupesomba ka Komiu,
ledo rapokonoMiu.
19 Pesomba anu nompakasana raraMiu bo nipokonoMiu,
haitumo
mpuu-mpuu manjoso rara,
madota majea bo matundu nte Komiu.
20 O Alatala,
kuperapi Komiu mabelo nte todea ri ngata Sion,
popeangga mpanjili tembo nantiku ngata Yerusalem.
21 Jadi [ane todea majea bo matundu nte Komiu] madambamo raraMiu mantarima binata anu masipato rapesomba ka Komiu,
jadi todeaMiu mombadekei japi lakina rapesomba ka Komiu ri bavo lanta pesomba.