Pehuku ka tona nokainggu nadaa
52
Dade pepatuduki nipovia i Daud ka pakeni ntopodade.
2 Dade hitu nipovia tempo i Doeg,
toEdom,
nakava nanguli ka i Saul kakava i Daud ri banua i Ahimelekh.
3 Hee tona naseseraka,
nakuya nioekamu pokainggumu nadaa
nte tona nipotove nu Alatala?
4 Njumaeo iko nebagiu bo nonia nadaa;
tesamu nompakadua rara mpo ladi natada.
5 Nipotovemupa anu nadaa pade anu nabelo,
nipokonomupa nodava pade notesa nakana.
Jedaa
6 Hee topebagiu!
Ante tesa-tesamu iko nebagiu bo nompakadua rara ntona.
7 Tapi iko rapakaropu nu Alatala sampe ri kasae-saena;
iko rasaka bo rakeni mpalai dako ri banuamu,
rakeni hau ri ponturo malaeka ntomate.
Jedaa
8 Nanggita povia nu Alatala haitu tona nokainggu nabelo maeka,
bo mompongirika iko,
raulira,
9 “Peintamo tona ledo nanjarumaka Alatala,
anu aga nanjarumaka kakalumanana nadea,
bo mompakadaa tona ntanina ala maroso karona mboto.”
10 Tapi yaku eva kayu zaitun naramanta tavana
riara banua nu Alatala.
Yaku nanjarumaka tove nu Alatala ledo ria kaupuna,
sampe kasae-saena.
11 Yaku mosukuru nte Komiu sampe kasae-saena,
sabana anu nipoviaMiu.
Ri ngayo ntodea nipotoveMiu,
yaku mosabiki kabeloMiu