Kadaa nu manusia.
53
Dade pepatuduki nipovia i Daud ka pakeni ntopodade,
nangoseaka dade nosanga:
“Mahalat”.
2 Tona nambongo nompekiri riara ntai:
“Ledo ria Alatala.”
Ira ledo ria nokainggu nabelo,
ira aga nokainggu nadaa bo najampa.
3 Dako ri suruga TUPU nompetiro pura-pura manusia,
mompeinta bara da maria tona manoto pompekirina bo mombasomba Ia.
4 Tapi pura-pura tona nesapuaka bo domo ria nabelo inggura
ledo ria saitoa nokainggu nabelo.
5 TUPU nanguli,
“Ledo nanoto rara ntona nokainggu nadaa gahaitu!
Ira natuvu nangagosi pakaupu todeaKu,
bo ledo ria sanggania nosambaya nerapi nte Yaku.”
6 Ira mpuu-mpuu naeka,
naupa ledo ria anu mompakaeka ira.
Sabana vesiamo Alatala mompatesi bali ntodeaNa bo buku-bukura makamburaka;
bali ntodea Alatala rapakaeya,
sabana nipoaraNamo ira.
7 Kuperapi Alatala makava dako ri bulu Sion,
mompakasalama toIsrael.
Jadi todea Israela madamba-damba,
tempo Alatala mompakabelo mpanjili katuvu ntodeaNa eva nggaulu.