Posambaya mekitulungi
54
Dade pepatuduki nipovia i Daud ka pakeni ntopodade.
Rapodadeka nangoseaka dala oni nu kacapi.
2 Dade nipovia tempo toZifi nakava nanguli ka i Saul,
i Daud netabuni ri ngatara.
3 O Alatala,
pakasalamamo yaku ante kuasaMiu,
bo ante karosoMiu salikumo yaku.
4 O Alatala epemo posambayaku,
bo parantaikamo tesaku.
5 Sabana tona nalanga rarana nakava nombasuu yaku,
tona nasombo madota mompatesi yaku,
ira ledo neose nte Komiu.
Jedaa
6 Tapi Komiu mpuu-mpuu nombatulungi yaku,
bo Komiu nompakaroso yaku.
7 Palambakamo kadaa nipoviara manjili nte ira mboto,
ropusimo ira sabana Komiu mpuu-mpuu nompakadupa janjiMiu nte yaku.
8 O PUE,
ante raraku mpuu kudekei pesomba ka Komiu,
bo yaku mosukuru sabana kabeloMiu.
9 Komiu nombakabasaka yaku dako ri kasusa,
bo yaku nompeinta baliku nidagi.