Posambaya nerapi ralenduti dako nte bali.
55
Dade pepatuduki nipovia i Daud ka pakeni ntopodade,
nangoseaka oni nu kacapi.
2 O Alatala,
epemo posambayaku,
talingaimo pomperapiku.
3 Parantaikamo yaku bo pesanakamo yaku,
raraku ledo natinonto sabana kakini nu raraku,
4 nangepe pepongare nu bali-baliku,
bo pepandasa ntona nadaa.
Sabana ira nompakasusa yaku,
bo ante kagigi rara ira nompobali yaku.
5 Raraku ledo nasiayu,
bo naeka mantingayo kamate.
6 Yaku nolete bo naeka,
bo naviaora mpuu yaku.
7 Nipekiriku:
“Ane aga nokapi mpo tonji banggebodo yaku,
yaku hau mevoro mangelo ponturo matinonto.
8 Bara mevoro makavao ntoto,
bo monturo ranggarava bai.
Jedaa
9 Yaku mompari mangelo petalendu
dako ri kasusa anu eva tambusisi bo poiri rimboso.”
10 O PUE,
pakaingumo rara nu bali-baliku,
pakagadomo potesara,
sabana nipeintaku pepandasa bo posinjanai najadi riara ngata.
11 Eo bongi ira nombalintiku ngata,
novia kadaa bo nompopeumba kagado.
12 Ri umba-umba naria kagado;
ri kasiromu ntodea ledo naupu-upu pepandasa bo pebagiu.
13 Ane rapana baliku mombasalai yaku,
da kupakulepa mombatahana.
Ane rapana baliku mombasayu yaku,
yaku mamala metabuni dako nte ia.
14 Tapi roaku mboto nompobalu yaku,
ia tona niparasayaku bo vega rapaku.
15 Ruru kami nosimporoa belo,
netupu singgani-nggani ri Banua nTUPU.
16 Palambakamo baliku sampesanika mamatemo
bo ira manau tuvu-tuvu hau ri ponturo malaeka ntomatemo,
sabana kadaa naria riara ntaira bo rabanuara.
17 Tapi yaku nekakai nte TUPU Alatala,
bo nipakasalamaNa yaku.
18 Eo bongi yaku nongau bo notumangi,
bo niepeNa suaraku.
19 Ia nompakasalama yaku tempo niraga nu baliku,
anu nadea mpuu nombasuu yaku.
20 Alatala anu noparenta dako ringgauluname
mompetalingai yaku bo mombadagi ira,
sabana ira ledo nadota majea,
bo ledo naeka nte Alatala.
Jedaa
21 Tona anu nosimporoa nte yaku baipia,
nangeva roa-roana,
bo ledo nipadupana janjina.
22 Tesa-tesana nabelo mpuu,
tapi naria vuu mata riara ntaina.
Potesana damo nalusu,
tapi netosu mpo ladi natada.
23 Ulimo kasusa raramu ka TUPU,
Ia mombatulungi iko;
sabana tona nanoa ledo rapalambaNa radagi.
24 O Alatala,
Komiu mombanavusaka tona nadaa gahaitu
hau riara lovu to ndalana ntoto.
Topebagiu bo topepatesi
ledo mandoe umurura.
Tapi yaku aga manjarumaka Komiu.