Nanjarumaka Alatala riara nggasusa
56
Dade i Daud nipovia ka pakeni ntopodade.
Dade hitu nipovia tempo ia nisaka ntoFilistin ri ngata Gat.
Dade hitu nangoseaka enggo nu dade nosanga:
“Tonji banggebodo ri loo kayu mbaso nakavao.”
2 O Alatala,
poasimo yaku sabana yaku nisuu nu baliku,
ira njuu-njuu nompandasa yaku.
3 Njumaeo ira nompandasa yaku;
nadea mpuu tona nangeva yaku ante langa rara.
4 Tempo yaku naeka,
yaku nanjarumaka Komiu.
5 Yaku mombatoiya Alatala sabana Ia kana nompadupa janjiNa,
yaku nanjarumaka Ia jadi ledo ria anu kupokaeka.
Ledo ria nuapa-nuapa mamala rapovia nu manusia ka yaku.
6 Njumaeo baliku nangelo dala mompanavu yaku,
ira njuu-njuu nonia mompakadaa yaku.
7 Ira madota mesuu,
nelingongo bo nompomata-mata yaku,
nangelo loga mompatesi yaku.
8 O Alatala,
pakaropu puramo ira ante rauMiu,
hukumo ira sabana pokainggura nadaa.
9 Komiu nangisani pura kadea kasusa nirasaiku,
bo nangisani kaoge uve mataku natiti;
pura-pura haitu nisaniMiu rekena.
10 Ri tempo yaku mekakai nte Komiu,
baliku radagi,
sabana nisaniku Alatala mosabingga nte yaku.
11 Yaku mombatoiya TUPU Alatala,
sabana Ia kana nompadupa janjiNa.
12 Yaku nanjarumaka Ia,
jadi ledo ria anu kupokaeka,
ledo ria nuapa-nuapa mamala rapovia nu manusia ka yaku.
13 O Alatala,
yaku mompakadupa janjiku nte Komiu,
bo mombadekei pesomba posukuru ka Komiu.
14 Sabana Komiu nompakasalama yaku dako ri kamatea,
Komiu nombajagai yaku ala ledo manavu;
bo yaku namala matuvu ri ngayoMiu,
riara reme anu nombadekei katuvua.