Posambaya mekitulungi
57
Dade i Daud nipovia ka pakeni ntopodade.
Dade hitu nipovia tempo i Daud riara bolo nu vatu nalaika i Saul.
Dade hitu nangoseaka enggo nu dade nosanga:
“Nee rapakaropu.”
2 O Alatala,
poasimo yaku,
sabana aga nte Komiu yaku metalendu.
Yaku metalendu nte Komiu eva ana manu netalendu ri tambe nggapi ntinana,
sampe menonto kasusa haitu.
3 Yaku mekakai nte Alatala anu Nelabi Kakuasana,
sabana Ia mombasaliku yaku dako ri baliku.
4 Dako ri suruga Ia mompesanaka yaku bo mompakasalama yaku;
Ia mompakaeya tona nompandasa yaku.
Alatala nompopakita Ia batena mompadupa janjiNa bo pepotoveNa ledo ria kaupu-upuna.
5 Yaku nipatiku nu baliku,
ira eva singa madota mombasaka manusia.
Ngisira mpo tavala bo mata pana,
dilara mpo taono natada.
6 O Alatala,
popakitamo kakuasaMiu ri langi,
bo popakitamo kaogeMiu ri njumangu dunia.
7 Baliku nompataa tolia ka yaku,
naupu mpuumo raraku.
Ira nokae lovu ri dalaku,
tapi ira mboto nanavu riarana.
Jedaa
8 O Alatala,
naroso pomparasayaku,
ledo nolengga raraku.
Yaku modade mantoiya Komiu.
9 Yaku membangu,
mogambusu bo mokacapi,
yaku membangu dopame mebonda mata nu eo.
10 O PUE,
yaku mosukuru nte Komiu
ri tatanga nu todea ngata.
Yaku modadeka petoiya ka Komiu
ri tatanga ntodea ri dunia.
11 Sabana toveMiu ledo ria kaupu-upuna,
nalanga mpo langi,
bo nasilele ri njumangu kulimu.
12 O Alatala,
popakitamo kakuasaMiu ri langi,
bo kaogeMiu sampe ri njumangu dunia.