Posambaya ala tona nadaa rahuku
58
Dade i Daud nipovia ka pakeni ntopodade.
Nangoseaka enggo dade nosanga:
“Nee rapakaropu.”
2 Hee komiu tona nakuasa,
ledo nanoa pobotusimiu,
ledo muni nanoa komiu nombatangara singgamanusiamiu.
3 Nangoseaka niamiu komiu novia anu nadaa,
bo komiu nokainggu nasese ri dunia hitu.
4 Da riara ntai ntina,
nioseaka ntona nadaa mamimo dala ledo nakana.
Dako nipoanaka topodava nasalandala mamimo.
5 Tesara nobisa mpo bisa nu ule,
bo ira netibongo eva ule nobisa.
6 Ule haitu ledo neose bo ledo neepe,
nte tona natau nompakanondo ia.
7 O PUE Alatala,
lelusimo karoso nu baliku
anu naroso mpo singa,
kotosimo ngisira,
bo osurakasimo ngisiasuna.
8 Dekeikamo ira malipo mpo sumoa nu uve,
bo malele mpo kavoko ri bivi nu dala.
9 Dekeikamo ira mpo voku majadi luro,
mpo ngana nalonju dopame nanggita reme.
10 Dekeikamo ira sampesanika maropumo,
mpo rangga ngau naupumo nikande nu apu dopame napane kura.
11 Tona nanoa nadamba,
tempo tona nadaa nihuku nu Alatala.
Naosa rarara,
tempo tona nadosa mamate.
12 Tona manguli,
“Mpuu-mpuu tona nabelo manggava tambo,
bo mpuu-mpuu nanoa pobotusi Alatala.”