Posambaya mekitulungi mangeva bali
59
Dade i Daud nipovia ka pakeni ntopodade.
Nipovia i Daud tempo i Saul nantudu tona nompomata-mata banuana ala rapatesi ia.
Dade hitu nangoseaka enggo dade nosanga,
“Nee rapakaropu.”
2 O Alatala,
kabasakamo yaku dako nte baliku,
lendutimo yaku dako nte tona mangeva yaku.
3 Kabasakamo yaku dako nte tona anu madota mokainggu madaa nte yaku.
Pakasalama yaku dako nte tona anu madota mompatesi yaku.
4 O PUE peintamo,
ira nelava madota mompatesi yaku,
tona naroso nombasuu yaku;
nau yaku ledo nokainggu nasala bo ledo novia dosa.
5 Ira nasadia bo nompari-mpari mombasuu yaku,
nau yaku ledo nasala.
Tulungimo yaku bo peintamo nuapa najadi ri karoku.
6 O Alatala,
topompajadi dunia bo isina anu nisomba ntoIsrael,
huku puramo todea-todea ngata,
tumo maasi mataMiu manggita ira anu nokainggu nadaa bo nangeva aturaMiu.
Jedaa
7 Nggovia-nggovia ira nakava mpanjili nanjayo-njayo rangata,
ira eva asu nesungiri.
8 Ira netunturaka;
tesa-tesara mpo taono natada.
Sabana nisarumakara ira ledo raepe nTUPU.
9 O PUE,
tapi Komiu aga nompongirika ira,
bo nompongeika ira.
10 Komiumo roso nggaroku,
aga Komiu nisarumakaku,
Komiumo nipetalenduku.
11 Alatala makava mbatulungi yaku,
sabana toveNa ledo ria kaupu-upuna,
yaku manggita Ia mombadagi baliku.
12 O PUE,
nee rapatesi ira,
ala todeaku ledo mombakalingasi berimbana Komiu nombahuku baliku.
Popalaimo ira hau ri umba-umba ante kakuasaMiu.
Komiumo topombalenduti kami,
dagisimo ira.
13 Ira nadosamo ante tesara;
palambakamo ira matetoliani ante pokainggura nadaa,
sabana ira nepindasi bo notesa dava.
14 O Alatala,
patesimo ira ante rau raraMiu,
ropusimo ira sampe maupu.
Ala rasani ntona pura Alatala nomparenta Israel,
bo nomparenta ri njumangu dunia.
Jedaa
15 Nggovia-nggovia ira nakava mpanjili nanjayo-njayo rangata,
ira eva asu nesungiri.
16 Ira eva asu naara taina,
bo ane ledo nabosu taina nogua.
17 Tapi yaku mombatoiya karosoMiu;
mpadondo-mpadondo yaku modade madamba sabana toveMiu ledo ria kaupu-upuna.
Sabana Komiu najadi petalenduku,
nipanggeniku raraku nasusa.
18 O Alatala,
Komiumo roso nggaroku,
kupodadeka dade petoiya ka Komiu,
sabana Komiumo petalenduku,
bo toveMiu ledo ria kaupu-upuna.