Posambaya nerapi radekeika padagi mangeva bali
60
Dade pepatuduki dako nte i Daud nipovia ka pakeni ntopodade. Nangoseaka enggo dade nosanga: “Posabi Bunga bakung.” 2 Dade hitu nipovia tempo i Daud nangeva toAram-Mesopotamia bo toAram-Zoba, tempo i Yoab nanjili nombadagi sapulu ronjobu toEdom ri Lemba Asin.3 O Alatala, nipoaraMiu kami,
bo nipalambaMiu kami nidagi,
naraumo raraMiu nte kami.
Hitupa pakabelo mpanjilimo kami.
4 Dunia nipopogoyaMiu sampe nebeka;
hitupa tutui mpanjilimo tana nebeka haitu.
5 NipalambaMiu todeaMiu nombarasai kasusa;
sampe nandasa mpuu nirasaira eva tona nalimpuno nanginu anggur nte kadungga-dungga.
6 Tapi tona nangoseaka tesaMiu nidekeiMiu tanda pepatora ka ira,
ala ira ledo masalanggadunggu. Jedaa
7 Pakasalama kami ante kuasaMiu, pesanaka pomperapi kami,
ala todea nipotoveMiu masalama.
8 Dako ri ponturoNa nagasa, Alatala nanguli,
“Yaku madamba bo mombabagi-bagi tana Sikhem
bo Lemba Sukot raukuru bo rabagi muni.
9 Tana Gilead bo tana Manasye, Yakumo tupuna.
Tana Efraim eva songgo baja nombalenduti balenggaKu.
Tana Yehuda eva toko magau tanda kakuasaKu.
10 Tana Moab eva loya nipomboliKu uve nipotoposiKu kadaKu.
Tana Edom nipotendeakaKu sandaleKu,
tandana tana gahaitu Yakumo tupuna.
Yaku nadamba-damba sabana nidagiKumo tana Filistea.”
11 O Alatala, isema manggeni yaku hau ri ngata Edom?
Isema manggeniaka yaku hau ri ngata nitembo naroso haitu?
12 O Alatala, domo rapeiliMiu kami?
Domo madota Komiu mosanggani nte tantara kami?
13 O Alatala, tulungimo kami mombadagi bali kami,
sabana petulungi manusia ledo ria gunana.
14 Mosinggani nte Alatala maroso mpuu kita,
Iamo mombadagi balita.