Posambaya nekisaliku nte TUPU
61
Dade i Daud nipovia ka pakeni ntopodade. Rapodadeka nangoseaka oni nu kacapi.2 O Alatala, epemo pekakaiku,
parantaikamo tempo yaku nosambaya!
3 Lako ri tampa nu dunia yaku nekakai nte Komiu,
sabana naupu raraku.
Keniakamo yaku hau ri ponturo natinonto,
hau ri bulu vatu nalanga ntoto.
4 Sabana Komiumo nipetalenduku,
Komiu eva tembo naroso nantarioloki yaku nte baliku.
5 Mabelopa yaku monturo riara banuaMiu sampe ri kaupu nggatuvuku,
ala yaku matinonto mpo ana manu niromuti ntinana. Jedaa
6 O Alatala, niepeMiu mpuumo anu nijanjiku ka Komiu,
bo komiu nombadekei pura anu nipasadia ka tona nangoseaka Komiu.
7 Perapi mandoe umuru nu magau,
ala ia matuvu sampe ri muli nu mulina.
8 O Alatala, perapi ala magau momparenta sampe ri kasae-saena.
Iamo magau pompelisiMiu.
Jagaimo ia ante tove bo kabeloMiu anu ledo ria kaupu-upuna.
9 Bo masaro kupodadeka dade petoiya ka Komiu,
eo-eo kupakadupa janjiku.