Rara natinonto nanjarumaka Alatala
62
Dade i Daud nipovia ka pakeni ntopodade, nangoseaka i Yedutun.2 Aga nanjarumaka Alatala natinonto nirasaiku,
aga Ia mompakasalama yaku.
3 Ia eva bulu vatu nombalenduti yaku bo aga Iamo nompakasalama yaku,
yaku ledo mogoya sabana Ia eva ngata nobente nombasaliku yaku.
4 Hee komiu pura-pura,
sampe maipia komiu mombasuu yaku bo mompandasa yaku?
Yaku nalentemo, damo eva rindi notumbirimo,
bo eva tembo damo kadunggana.
5 Komiu aga nonia mombanavusaka yaku dako ri nturoku nalanga,
bo komiu nompokono dava.
Ante sumbamiu komiu nerapi rasi ka tona ntanina,
tapi riara ntaimiu nepindasi. Jedaa
6 Aga nanjarumaka Alatala natinonto nirasaiku,
sabana aga Ia nisarumakaku.
7 Ia eva bulu vatu nombalenduti yaku bo dako nte iamo kasalamaku.
Yaku ledo mogoya sabana Ia eva ngata nobente nombasaliku yaku.
8 Iamo nompakasalama yaku bo nompajadi yaku rabila,
Ia eva bulu vatu naroso nombajagai bo nombasaliku yaku.
9 Hee todeaku, parasaya njuumo Alatala,
tesa puramo vua mpekirimiu ka Ia,
sabana Iamo nipekanaluuta. Jedaa
10 Manusia aga eva poiri,
tona nakalumana bo napakasi nasimbayu ledo noali.
Ane ratimba natantu ira mangaa,
mangaapa pade poiri.
11 Nee manjarumaka mbara-mbara nikavamiu ante dala nompandasa tona ntanina,
bo nee mangoeka mbara-mbara anu niagosimiu dako nte tona ntanina.
Nau damo mantambai kakalumanamiu,
nemo aga haitu rapekirikamiu.
12 Mpengani-ngani Alatala notesa;
kakuasa aga nopuna dako nte Ia,
13 bo tove ledo ria kaupu-upuna,
aga nopuna dako nte Ia muni.
O PUE, Komiu nombatangara tona
nangoseaka pokaingguna.