Lentora nte Alatala
63
Dade i Daud, tempo ri karava bai Yehuda.2 O Alatala, Komiumo Alatala nisombaku,
Aga Komiu nipolentoraku.
Yaku noparaluu Komiu riara nggatuvuku,
eva tana nabai noparaluu uve,
ivesia muni yaku nalentora nte Komiu.
3 Palambakamo yaku mangganoto Komiu ri BanuaMiu,
mompeinta karoso bo kaogeMiu.
4 ToveMiu ledo ria kaupu-upuna noalipa pade katuvuku,
sabana haitu yaku mantoiya Komiu.
5 Sampe rikaupu nggatuvuku yaku mantoiya Komiu;
kuunggataka paleku bo mosambaya merapi nte Komiu.
6 Ante damba rara bo suara mamangga,
yaku mantoiya Komiu.
Eva kandea narasa nompakaosa raraku
ivesia muni Komiu nompakaosa nyawaku.
7 Tempo yaku naturu nitoraku Komiu;
njambongi-mbongi yaku nantanondoaka Komiu.
8 Mpuu-mpuu Komiumo topotulungi yaku;
yaku modade nte damba rara, apa komiu nombalenduti yaku.
9 Yaku madota mosinggani nte Komiu,
bo kuasaMiu nombarosoki yaku.
10 Tapi tona nonia mompatesi yaku
manau ri poturo malaeka ntomate.
11 Ira mamate riara mposieva,
bo majadi kandea binata nasoa.
12 Tapi magau kana madamba sabana petulungi nu Alatala;
tona nojanji nanggasangai Alatala kana masana rarana,
tapi sumba ntopodava kana ratutui.