Posambaya mekijagai dako ri nia ntona nadaa
64
Dade i Daud nipovia ka pakeni ntopodade.2 O Alatala, epemo posambayaku tempo yaku nasusa,
pakasalama katuvuku dako nte bali nompakaviora rara.
3 Jagaimo yaku dako ri posintuvu ntona nadaa,
bo dako ri lunu ntona nonia nadaa.
4 Dilara natada mpo taono,
bo tesa nisovadakara nalonto, netosu mpo mata pana.
5 Dako ri petabunira nipanavura tona ante tesa-tesa dava,
bo ledo ria eka rarara notunturaka tona ledo nasala.
6 Ira ledo naupu-upu nonia nadaa,
bo notesa niara mompataa nggalino tolia;
nisarumakara ledoria tona manggita ira.
7 Ira nonia nadaa, bo nanguli,
“Kami nasadiamo, nia kami, naliangumo.”
Rara bo pekiri manusia eva uve nandala mpuu,
ledo namala nigugu kandalana.
Pehuku ka tona nadaa
8 Tapi Alatala nombapatesi ira eva tona nambela mata pana,
sampesanika nabakamo.
9 Ira naropu sabana tesara mboto;
pura-pura tona nokumaa nanggitana.
10 Jadi pura-pura tona naeka,
bo nompatolele anu nipovia nu Alatala,
bo nombatonondoaka pakarajaa nu Alatala.
11 Jadi pura-pura tona anu nokainggu nabelo madamba rarara
sabana anu nipovia nTUPU.
Pura-pura tona nokainggu nanoa masana rarara.
Ira metalendu nte TUPU.