Petoiya bo posukuru ka Alatala
65
Dade i Daud nipovia ka pakeni ntopodade.2 O Alatala, aga Komiu masipatomo ratoiya kami ri ngataMiu ri Siona,
bo kami mompakadupa janji kami nte Komiu.
3 Komiumo nompoiyo posambaya kami;
bo pura-pura tona nakava nombasomba Komiu.
4 Dosa bo pokainggu kami nasala nantamopa pade karoso kami,
tapi Komiu nombaampungi kami.
5 Masana mpuu tona nipelisiMiu marapa nte Komiu
maroo ri banuaMiu.
Pura-pura anu nabelo ri banuaMiu, ri ponturoMiu nagasa
mompakaosa rara kami.
6 O Alatala topompakasalama kami,
Komiu nompoiyo posambaya kami bo nombadekei padagi ka kami ante poviaMiu nabaraka bo nanoa.
Todea-todea nu ngata ri njumangu dunia,
nanjarumaka Komiu.
7 NipajadiMiu bulu-bulu ante karosoMiu
mompopakita kuasaMiu naroso.
8 Komiu nompopetaa balumba ntasi,
bo nompopenonto kagado ntodea-ntodea ngata.
9 Pura-pura toponturo ri dunia
naeka bo nokumaa nanggita poviaMiu nabaraka.
Ri njumangu dunia dako ri mpandakena sampe ri mpanauna,
manusia nipoviaMiu novoo nadamba.
10 Komiu nomparantaika tana ri dunia bo nombadekei uda,
nipakaboyaMiu sampe nadea aselena.
Binangga-binangga nipakaogeMiu uvena,
bo Komiu nompakasadia gando ka manusia.
Ivehaitumo Komiu nompakasadia pura-pura haitu ka manusia.
11 Komiu nombauvesi dala mpajekona
bo nombabanggasi tubi-tubi ntana.
Ante pedunggu nu uda nompakaluu tana,
Komiu nompakatuvu tuda-tuda sampe nosepi.
12 Mpae-mpae kami nosoreaka aselena sabana kabeloMiu.
Ri umba naria Komiu, ri sia mpelabi-labi asele nabelo.
13 Karava-karava naboya kavokona bo naramanta tavana,
pura-pura bulu mpo manusia nadamba.
14 Karava-karava navuni nte tovau bo bimba,
lobu-lobuna naponu nte gando.
Pura-pura haitu eva manusia anu nasana nodade nte damba rara.