Dade petoiya
66
Dade i Daud nipovia ka pakeni ntopodade.Hee komiu todea ri njumangu dunia kadamba-dambamo komiu nte Alatala.
2 Podadekamo kaogeNa,
bilamo Ia ante petoiya.
3 Ulimo ka Ia,
“Nabaraka mpuu poviaMiu!
BaliMiu madota ledo madota kana mantaputu nte eka rara ringayoMiu,
sabana naroso mpuu kuasaMiu.
4 Tona ri njumangu dunia mombasomba Komiu,
ira nodade nombatoiya Komiu.” Jedaa
5 Peintamo pokarajaa nu Alatala,
nabaraka mpuu panggaviaNa ri tatanga nu manusia!
6 Tasi bo binangga nipakabaiNa,
totuata nggaulu nevote nolipa ri tana bai.
Jadi kita nadamba sabana anu nipoviaNa.
7 Ia nomparenta ante karosoNa
sampe kasae-saena.
Todea-todea ngata niparantaikaNa,
jadi topesapuaka nemo mompakalanga rara ri ngayoNa. Jedaa
8 Hee todea-todea ngata, pakaogemo Alatala nisomba kami,
podadekamo dade petoiya ka Ia!
9 NijagaiNa kami ala batena matuvu,
bo ledo nipalambaNa kami manavu.
10 O Alatala, niujiMiumo bo nipakagasaMiu rara kami
mpo tona nompalabu salaka rapompeinta kagasana.
11 NipalambaMiu kami nanavu riara mpale nu bali kami,
bo nidekeiMiu panggeni nantamo ka kami.
12 NipalambaMiu kami nijeje-jejesi nu bali kami;
kami nandasa mpuu mpo tona nombavote lono bo nodala ri mata nu apu.
Tapi hitupa nikeniMiumo kami,
hau ri ponturo nasana bo natinonto.
13 Yaku hau ri BanuaMiu manggeni binata-binata rapalabu rapesomba ka Komiu,
bo nompakadupa janjiku nte Komiu,
14 janji nisovadakaku
tempo yaku riara nggasusa.
15 Binata-binata toboyana iamo tovau, bimba bo japi lakina
rapalabu kupesomba ka Komiu
bo ununa meore hau ri langi mompakasana raraMiu. Jedaa
16 Hee pura-pura komiu topomparasaya Alatala, kamaimo bo epemo
kutesa ka komiu anu nipovia nu Alatala ka yaku.
17 Yaku nekakai nekitulungi nte Ia;
bo modadeka dade petoiya.
18 Ane rapana maria nia nadaa ri pekiriku,
natantumo TUPU ledo madota mompetalingai posambayaku.
19 Tapi nipetalingai nu Alatalamo,
bo niparantaikaNamo pomperapiku.
20 Yaku mombatoiya Alatala sabana ledo nipoaraNa posambayaku,
bo ledo nenonto nompotove yaku.