Kadaa pokainggu nu manusia
14
Dade i Daud nipovia ka pakeni ntopodade.
Todoyo nanguli riara ntaina,
ledo ria Alatala.
Nadaa bo nojampa mpuu pokainggura
ledo ria nokainggu nabelo.
2 Dako ri suruga TUPU Alatala nompetiro manusia.
NieloNa tona nanoto pekirina mombasomba Ia.
3 Tapi pura-pura tona nesapuakamo,
nadaamo katuvura bo ledo naria saitoa nokainggu nabelo.
4 TUPU nanguli,
“Tona nadaa natuvu nangagosi todeaKu
mpo tona nangande roti,
bo ledo nisombara Yaku.
Ledo nisanira [Yaku mombahuku tona nadaa?]”
5 Maviora mpuu rara ntona nadaa,
sabana Alatala mombasaliku tona natutu nangoseaka Ia.
6 Tona nadaa nombalava nia ntona napakasi,
tapi TUPU nombasaliku tona napakasi.
7 Kuperapi TUPU Alatala makava dako ri Bulu Siona
mompakasalama toIsrael!
Madamba mpuu muli i Yakub,
haitumo toIsrael,
tempo TUPU Alatala mompakabelo mpanjili todeaNa eva nggaulu.