Posambaya merapi rajagai nTUPU tempo matuamo
71
O Alatala, yaku aga metalendu nte Komiu,nemo rapalamba yaku maeya sabana pomparasayaku Komiu.
2 Kabasakamo yaku [dako nte tona nadaa], sabana kanoaMiu,
petalingai bo pakasalamamo yaku.
3 Lendutimo yaku, eva bulu vatu mombalenduti yaku,
petalendu anu naroso mompakasalama yaku.
Sabana Komiumo petalendu bo petabuniku naroso,
Komiu eva bulu vatu bo bente anu nombalenduti yaku.
4 O Alatala nisombaku, pakasalama yaku dako nte tona nadaa,
bo dako rampale tona nasese bo ledo ria asi matana.
5 O PUE Alatala, Komiu nisarumakaku.
Komiumo panjarumakaku,
dako ri kakodikume Komiu niparasayaku.
6 Dakome riara ntai ntinaku aga Komiu nisarumakaku.
Yaku nesuvu dako riara ntai ntinaku sabana kakuasaMiu.
Jadi yaku kana mantoiya Komiu.
7 Katuvuku majadi jonjo ka todea ntanina,
sabana Komiu naroso nombajagai yaku.
8 Yaku njuu-njuu mantoiya Komiu,
bo njumaeo mombabila Komiu.
9 Nemo matuapa yaku domo rapeiliMiu,
bo nemo rapalaisi ane yaku maleomo.
10 Sabana bali-baliku nangulisi yaku,
ira nasiromu nonia mompatesi yaku.
11 Nanguli ira, “Nipalaisi nu Alatalamo ia,
anumo! Raragata bo rasakata sabana domo ria topotulungi ia.”
12 O Alatala, nemo rakavaosiMiu yaku,
tulungimo yaku masalisa.
13 Palambakamo tona nompobali yaku
maeya bo raropusi.
Palambakamo tona anu nonia mompakasala nggadunggu yaku
rapakaingu rarara bo rapakaeya.
14 Tapi yaku batena manjarumaka Komiu,
bo ledo ria kaupu-upuna mantoiya Komiu.
15 Njuumaeo kutesaki poviaMiu nanoa bo pepakasalamaMiu,
bo kabelo nipoviaMiu ka yaku ledo namala nirekeku.
16 Yaku mantoiya karoso nTUPU Alatala,
bo mompatolele aga Ia nanoa.
17 O Alatala, dako ri kakodikume Komiu nompatuduki yaku,
sampe sii-sii kutesaki asele mpoviaMiu anu nipokumaaka.
18 O Alatala, nau yaku matuamo bo mauvamo,
nemo rapalaika yaku
ala yaku mompatolele kuasa bo karosoMiu anu nipokumaaka,
ka pura-pura anaku bo ka muli nu muli kami ri eo nggapurina.
19 O Alatala, KanoaMiu nalanga mpo langi anu ledo naria pantaana;
Komiu novia anu nipokumakaa.
Ledo ria masimbayuka Komiu.
20 Komiu nompalamba kasusa nantamo manggava yaku,
tapi Komiu mompakaroso mpanjili karoku
bo nombasoreaka mpanjili yaku dako ri ponturo malaeka ntomate.
21 Komiu novia yaku nibilapa vai pade nggaulu,
bo nompakasana mpanjili raraku.
22 O Alatala nisombaku, yaku modade mogambusu mantoiya Komiu,
sabana kabeloMiu ledo ria kaupu-upuna.
Yaku mokacapi modadeka dade ka Komiu.
O Alatala anu nisomba ntoIsrael Komiu ledo ria kasimbayuna.
23 Yaku nadamba,
bo modade mamangga ka Komiu.
Nyawaku muni madamba nodade,
sabana nipakasalamaMiumo yaku.
24 Njuumaeo kupatolele kanoaMiu,
sabana tona madota mompakanavu yaku
nidagimo bo nipakaeya.