Posambaya riara nggasusa
69
Dade i Daud ka pakeni ntopodade. Nangoseaka enggo dade nosanga: “Bunga Bakung.”2 O Alatala, pakasalamamo yaku,
sabana kasusa nirasaiku eva uve mombaongasi yaku nompene sampe ri tamboloku.
3 Nirasaiku eva naonga rantampo nandala,
ledo ria anu rapeangga.
Nirasaiku eva nalodo ra ntasi nandala,
nitompesaka nu balumba.
4 Naleo bo nasaomo tamboloku nekakai.
Mataku naporo puramo nantongoraka petulungi dako nte Alatala nisombaku.
5 Tona nompovuu mata yaku tapi ledo ria sabana,
nadeapa ira pade bulua ri balenggaku.
Nadea mpuu tona anu madota mompatesi yaku,
ira nobalika yaku naupa ledo ria sabana.
Yaku nipasuu mompopanjili
kakalumana anu ledo niagoku.
6 O Alatala, nisaniMiu pokaingguku nadoyo,
bo Komiu nangganoto dosa-dosa nipoviaku.
7 O PUE Alatala anu nompajadi dunia bo isina,
nemo pokainggu bo poviaku, mompakaeya tona nanjarumaka Komiu.
O Alatala, nisomba ntoIsrael,
Nemo pokainggu bo poviaku haitu,
mompakaruto tona nombasomba Komiu.
8 Yaku nipakaeya ntona sabana nomparasaya Komiu,
bo yaku niuli ntona naruto.
9 Yaku mpo tona ntaninamo ri mata nu sampesuvu-sampesuvuku,
bo yaku damo aga eva topesovo ri mata nu sampesuvu koyo puseku.
10 Kadidi raraku nantambai sabana pompotoveku BanuaMiu,
tesa-tesa ntona nombasalai Komiu nambela muni ri karoku.
11 Yaku notumangi bo nopuasa,
tapi aga nisalaira yaku.
12 Yaku nompake baju nipovia lako ri karu tanda kabuku rara,
tapi aga nipongirikara yaku.
13 Yaku najadi vua ntesa ntona nasiromu,
bo tona nalimpuno nodade nompakaeya yaku.
14 O Alatala, yaku nosambaya nerapi nte Komiu,
pesanakamo yaku ri tempo nipodotaMiu.
Dekeimo petulungi ledo ria kaupu-upuna,
sabana kambaso toveMiu.
15 Nee rapalamba yaku malonjo ra ntampo
bo maonga rarauve,
pakasalamamo yaku dako nte tona nompovuu mata yaku.
16 Nee rapalamba yaku rakenisi balumba,
bo malodo ri tambe ntasi
bara mateivu riara bolo nandala.
17 O PUE, pesanakamo yaku,
sabana pepotoveMiu ledoria kaupu-upuna.
Parantaikamo yaku
sabana kambaso asi nu raraMiu.
18 Nee ranga ratubengosiMiu yaku, batuaMiu,
tulungimo yaku masalisa sabana yaku nikava nu susa.
19 Pakasalamamo yaku,
kabasaka yaku dako nte bali-baliku.
20 NisaniMiu berimba baliku
nombasalai, nompakadaa bo nompakaeya yaku.
21 Pesalai haitu nompakalente raraku,
bo nompakaupu dota raraku.
Nieloku tona anu maasi matana, tapi ledoria
Nieloku tona mompakaroso raraku, tapi ledo nikavaku.
22 Baliku aga nombadekei kandea napai mpo racu ku kande;
bo nombadekei anggur napoi ku inu tempo nabai tamboloku.
23 Dekeikamo kandea ni kandera ri posusa mompakasilaka ira,
bo posusa posukuru nipoviara mbatoliani ira.
24 Dekeikamo matara maburo bo domo mekanoto,
bo domo maroso karora.
25 Uvarakamo rauMiu ka baliku,
dekeikamo rau raraMiu mevoya-voya mambela ira.
26 Dekeikamo ponturora malino njii,
bo ledoria tona monturoka.
27 Sabana baliku aga nombatambai kandasa ka tona anu nihukuMiu,
bo nombatambai dua ntona nipandasaMiu.
28 Dekeikamo mantambai kadea sala nu baliku
nee rapakakana ira.
29 Dekeikamo sangara ralalisi dako ri Buku Katuvua;
bo nemo ratulisi sangara mosinggani nte tona nabelo.
30 O Alatala, yaku nandasa bo nadua,
tulungi bo pakasalama yaku.
31 Yaku modade mombatoiya Alatala,
bo mompakaoge Ia ante dade posukuru.
32 Masipatopa pokainggu ivehaitu ri panggita nTUPU
pade mombadekei binata nipesomba eva japi lakina naboya.
33 Hee komiu tona nipandasa!
Peintamo Alatala nombatulungi yaku!
Kadambamo bo pakaroso mpanjili panjarumakamiu,
komiu tona anu nombasomba Alatala.
34 Sabana TUPU nompetalingai perapi ntona napakasi
bo ledo nikalingasina tona riara ntarunggu anu nomparasaya Ia.
35 Aginamo langi, dunia, tasi bo pura-pura anu natuvu riarana,
mombatoiya Alatala.
36 Ia mompakasalama toYerusalem
bo rabanguNa mpanjili ngata-ngata ri tana Yehuda.
Todea nTUPU monturo hamai;
ngata haitu majadi ngatara mboto.
37 Muli-muli ntona anu nomparasaya TUPU rakabolikana;
bo tona anu nompotove TUPU monturoka tana haitu.