Dade padagi
68
Dade i Daud nipovia ka pakeni ntopodade.2 Alatala nakava nompakagado baliNa,
tona nompovuu mata Ia nalai dako ri ngayoNa.
3 Alatala nompopalai ira,
eva unu nuapu nitavusi mpoiri nasalisa nalipo,
bo eva lili nagonu napara apu.
Ivesiamo tona nadaa naropu ri ngayo nu Alatala.
4 Tapi tona natundu nte Alatala nasana,
bo nadamba ri ngayo nu Alatala.
5 Podademo ka Alatala, toiyamo Ia,
pasadiamo dala ka Ia anu nesavi kulimu.
SangaNa iamo TUPU,
kadamba-dambamo ri ngayoNa!
6 Alatala nonturo ri banuaNa nagasa,
Iamo topanjaliku timbala-timbala bo najadi tuama ka ngana-ngana pailu.
7 Alatala nombadekei ponturo ka tona anu natuvu saito-itona,
bo Ia nombakabasaka tona nitavani bo nompakadamba rarara.
Tapi tona nangeva TUPU maroo ranggarava bai.
8 O Alatala, tempo Komiu nanggeniaka todeaMiu
nolipa ri karava bai, Jedaa
9 dunia nogoya bo uda nanau dako ri langi
ri ngayoMiu.
Komiumo Alatala nombadekei tesa ri bulu Sinai,
Alatala nisomba ntoIsrael.
10 Uda romba nipopanauMiu,
sampe tana nabai nabangga mpanjili,
11 bo hamai nikaroo ntodeaMiu.
O Alatala, Komiu nombaganai katuvu ntona napakasi,
sabana kabeloMiu.
12 TUPU notesa,
bo mombine-mombine nanggeni kareba:
13-14 “Magau-magau bo tantarana nalaimo!”
Ira nalai mpo tonji banggebodo nevoro nalai.
Mombine-mombine ri banua nobagi-bagi salaka bo bulava niago dako nte balira anu nidagi.
Nau ledo nadea ira hau nosieva,
todea nu Alatala kana padagi.
Nau tona ledo netuntuni nosieva
nanggava bagia muni.
15 Tempo Alatala nambaso kakuasaNa nompakasimpotare magau-magau hamai,
nipopanauNa salju ri bavo Bulu Salmon.
16 Bulu Basan bulu anu ledo ria kasimbayuna,
bulu anu nadea oruna,
17 nakuya komiu toponturo ri bulu Basan nasiriati nanggita toponturo ri bulu Sion bulu anu nipelisi nu Alatala rakarooNa?
TUPU maroo hamai sampe kasae-saena.
18 Kareta-kareta nu Alatala nopulu-pulu njobu, ledo nisani rekena.
Alatala nakava dako ri bulu Sinai, hau ri BanuaNa nagasa.
19 Ia neore hau ri kalangana;
nanggeni nadea tona nitavani.
Ia nantarima pesomba dako nte manusia
naupa dako nte manusia nesapuaka.
TUPU Alatala naroo hamai.
20 Toiyamo TUPU, sabana Iamo Alatala nompakasalama kita;
eo-eo Ia nombatulungi kita. Jedaa
21 Alatala nisombata Iamo topepakasalama,
Ia nombakabasaka kita dako ri kamatea.
22 Alatala natantumo mombarupusi balengga nu bali-baliNa,
ira njuu-njuu natuvu riara dosa.
23 TUPU nanguli, “Hee todeaKu, Kukeni mpanjili balimiu dako ri Basan
bo dako ri tasi nandala,
24 ala komiu mamala mombajeje-jejesi raara,
bo asu-asumiu mombadilana sampe mabasa.”
25 O Alatala, pura-pura tona nanggita todeaMiu nolipa nte damba rara sabana Komiu padagi,
Alatala ni sombaku Iamo Magauku bo todeaMiu nolipa ante damba rara hau ri BanuaMiu Nagasa
26 Topodade nolipa ri kolu,
ri tatangana randaa-randaa norabana,
bo ri puri topokacapi;
iveimo dadera:
27 “Toiyamo Alatala ri tatanga kasiromu ntodeaNa,
hee pura-pura muli i Yakub toiyamo Tupu!”
28 Valaa i Benyamin muli ana kaupu i Yakub, nolipa ri kolu,
pade nisunju nu pakeni-pakeni valaa i Yehuda
bo pakeni-pakeni valaa i Zebulon bo valaa i Naftali.
29 O Alatala, pakemo karosoMiu eva anu nipoviaMiu nggaulu,
Komiumo nombatulungi kami.
30 Magau-magau nanggeni pesomba ka Komiu
ri BanuaMiu ri Yerusalem.
31 Pokaraumo pakeni-pakeni ntodea ngata Mesir anu nasimbayu mpo binata ranggarava.
Tuenakamo todea-todea ngata Mesir, anu nasimbayu mpo japi nte ana-anana.
Ira nosipandasa ala manggava doi.
Alatala mompakagado todea-todea ngata anu nipokonona nosieva.
32 Tomaoge-tomaoge ngata Mesir nakava nanggeni tambaga;
toSudan njara-njaramo nanggeni pedekei ka Alatala.
33 Hee komiu ri pura-pura kamagaua ri dunia, podademo ka Alatala,
podadekamo dade petoiya ka TUPU. Jedaa
34 Iamo anu noliu ri langi bo naria mamimo dako ri nggauluname.
Parantaikamo, Ia mompopaepe kamangga nu suaraNa anu ledo ria simbayuna.
35 Patolelemo kuasa nu Alatala,
Ia najadi magau nomparenta toIsrael.
Langi nompopakita kakuasa nu Alatala.
36 Tempo Alatala nesuvu dako ri BanuaNa
mpu-mpu ledo ria kasimbayuNa.
Alatala nisomba ntoIsrael nombadekei kuasa bo karoso ka todeaNa.
Ratoiyamo Alatala!