Basozi ba Buza
2
1 Kwabezaga balengania ba buza munkatini mwa babo bantu, ububo lingo kukaba basozi ba buza munkatini mweinyu, babo beingizie meigisia mabi ku lumbisombiso, nu batune Mukota wabakulwide, nu beimanine lusungio kitangalabesi. 2 Nu bantu beingi bakabayanga mu misako zabo za butazi, nu nzila za bulili zikalingwa ku kabamba kabo. 3 Nu ku ntundo mbi, beimonenne mutali kumuli, ku bitondo bya bwengelezi, nu lusungio lwabo talukwizizia kutukila wakalazi nu kubiga kwabo takukuzenzela! 4 Kubuno ndi Kalaga ntasigilide banzelo bagile, tondo abeisile mu muzinga nu ababikile mu kikando kya kapilo buno balangwe aaba nu gabakasungibwa; 5 nu ndi ntasigilide kisi kya wakalazi, tondo onezie bantu kinana, umozi abezaga Noa, musambazi wa bwisanana, gaalusizie mwiyalo munene nunse kukukila kisi kya batakwanza Kalaga; 6 nu ndi asungizie miino za Sodoma nu Gomora nu kuzigalukya lwito, bubo akitile kalolesio ku bantu batakwanza Kalaga; 7 tondo onezie Loti, wozo wisanana, wabezaga nunse na kabebe ku misako zitaswaga za babo bantu babi, 8 kubuno wono muntu wisanana wikalaga munkatini mwabo, ababazibagwa busi na busi mu mutima wage ku kabamba ka byamonagako nu byungwagako bya makitilo mabo matakulungana na mulembe; 9 Mukota eizi konia bantu bakutunda nunse Kalaga ku malindiko nu kulanga bateisanana buno bababazibwe ku busi bwa lusungio, 10 kwitila nunse babo bakuyanga mubili mu ntundo za bitondo bya nsese nu bakubenga bwangato. Bantu batakukua boba nu beli na lwikotio, tabeli na boba ku kulinga bangati, 11 tondo banzelo beli banene nunse ku magala nu ku bupuka, tabakubekela masongelo ma bilingano lwabusio lwa Mukota. 12 Tondo bantu babo bakususania nyama ziteli na menge, zabutilwe ku bumba buno zikakatagwa nu kwitwa, bakutenda mu lukita lwa bilingano lubatakumenya, nu bazike ku kubiga kwabo bobenyene, 13 babe na mbabazio anga lukalilo lwa mibi zabo. Bakubogaboga nunse ku kukita kwabo ntundo mbi mu musi; bantu babi nu ba nsese, bakwibogiabogia mu bwengelezi bwabo, ku kukita kisagulo gamozi n'inyuwe. 14 Beli na meiso meiyala na butazi nu beli bantu batakusiga kukita bwagi, bakulubikania mitima ziteli na magala; beli na mitima za bumba bwa ntundo mbi; beli bana baswilidwe, 15 batukile mu nzila zisanana, nu bakule kiti mu kuyanga nzila za Balama, mwana wa Beori, watundaga lukalilo lwa bitondo bibi, 16 tondo azugidwe ku bwagi bwage wenyene: mpunda zitavwamaga kutenda, zatendile mu iyuki lya muntu, zananizie bukongolo bwa mulengania. \f + Mag. 22:21, 23-31 1PE – 1 Petro
17 Bantu babo beli bisima biteli na mazi, nu lutundutundu lukusindikwa na lumpumpu lukali: mwizi wa kapilo walangilwe kubeli. 18 Kubuno bakutenda bitondo binene bya lwikotio, nu ku ntundo za mubili, nu za butazi, bakubuluta bantu balingile kutina babo bakulamaga mu bwengelezi; 19 bakubalagaga buno bakandulwe, nubo bobenyene beli bakobe ba kubiga, kubuno muntu unsania eli mukobe wa kikyo kyamuvwama. 20 Kubuno, kusila kwa kutina nsese za kisi, ku kumenya Mukota nu Monia Yesu Kristo, ndi basubya lingo kubyo nu bakindwa, lukita lwabo luzinda nti lwabiga nunse kutinga lulo lutangi. 21 Kubuno bunabede neibineibi kubeli songo tabamenyininne nzila zeisanana, kutinga kuzimenya nu kusiga ikakizio lyasililila libakasilwe. 22 Nu bwababaside anga bukutenda musumo wa bulili bunee: “Mboa zasubya lingo ku bisazi byasalaga,” nu “Ngulube zogibwa, zasubya lingo kubulubuta mu bisogo.”