1 PETRO
Kusambizania
1
1 Petro, musingwa wa Yesu Kristo, ku basombolwa babo beli bageni nu babalanganizibwe nu ku Ponto, nu ku Galatia, nu ku Kapadokia, nu ku Asia nu ku Bitinia, 2 nu basombwedwe kuyangana na kulinga kumenywa na Kalaga Tateiswe, ku kusililila mu Muuza, buno babe bantu bakwanza, nu bakusandilwa mikila za Yesu Kristo: Mponga nu bubobelelo bitalikilwe kumuli. Kilemanizio Kili na Kalamo
3 Aganunwe Kalaga Isi wa Mukota weitu Yesu Kristo, wozo watubutile limbizi lya mabili kuyangana na kyombo kyage buno tube na kilemanizio kya kalamo ku kuyuka kwa Yesu Kristo kutuka ku bakuzi, 4 buno tube na bupieni butanavwama kubiga, aba buteli na nsese, aba butanakokoka, bwabikilwe kumuli mwigulu, 5 beinyuwe bakulangwa na magala ma Kalaga mu bukatizio buno mube na lonio luli kayikayika kulolesibwa ku nkungu nzinda!
6 Bubo u bukumubogiabogia nunse, aaba kano kaluma ku nkungu nkeke mwatunganana kuba na tubebe ku malindiko mengukana, 7 buno ku idindiko lya bukatizio bweinyu, buli bwa bukunza bukali kutinga olo zikuziminaga, aba ndi zikulindikwa ku keiya, bumoneke buno buli busoga nu bwabe na luganuno, nu lutanuno nu lwanzo ku kumoneka kwa Yesu. 8 Mukumutunda geteli kumumonako, nu aba ndi tamukumumonako kano kaluma, mukumukatizia nu mwiyala na mbogimbogi zitanavwamwa kusambalwa, mbogimbogi zili na lutanuno, 9 kubuno mukakaswa lonio lwa mitima zeinyu u lukalilo lwa bukatizio bweinyu.
10 Ku musagu wa lonio luluno, balengania balondile kusongolola nunse, nu balenganizie musagu wa mponga zimwabikidwe; 11 batundaga kumenyinina nkungu nkizi nu bitondo bikizi byalolesizibwe na Muuza wa Kristo wabezaga mubeli nu walingile kulongekela mbabazio za Kristo nu lutanuno lukayanga kusila kwa bubo. 12 Balolesizibwe buno tabwabede ku kabamba kabo bobenyene, tondo ku kabamba keinyu, u kubabede bakiti ba bitondo bibino, bimukusambalilwa kano kaluma na babo bamusambalilaga Musagu Musoga ku Muuza Wasililila wasingilwe kutuka mwigulu, nu mu bitondo bibino banzelo bakutunda kulola buno babimenyinine.
Mubila wa Kulama ku Kusililila
13 Ku bubuno, kokomeziazi menge meinyu, mube bantu ba nkiki nu mube na kilemanizio nunse ku mponga zimukakaswa ku nkungu za kumoneka kwa Yesu Kristo. 14 Anga bana beli na lwanzo, tamwidingimanie na ntundo zeinyu zimwabezaga nazo wakalazi, gamwabezaga mu bukongolo bweinyu. 15 Tondo, anga wozo wamumanine eli wasililila, nu inyuwe mube basililila mu misako zeinyu insania, 16 anga bwasanzilwe bunee: “Mube basililila, kubuno nne nili Wasililila.”
17 Nu ndi mukumumana buno, Tateiswe, wozo ukusungia muntu na muntu anga bwakukita geteli kukutya muntu wampa, mulame mu boba mu nkungu zimukili ga kisi. 18 Mwizi buno, tamwakulwidwe na bikubigaga, aba ku feza, aba ku olo ku lukita lutaswaga, lwatukile ku basoinyuwe; 19 tondo ku mikila za bukunza bubibu, za Kristo, anga kyana kya mukoko uteli n'itondoki, aba byulu. 20 Asombwedwe kutukila wakalazi, nti kisi takiba, tondo alolesizibwe kuzinda kwa nkiko, ku kabamba keinyu; 21 mweli muse mwakatizia Kalaga wamuyukizie kutuka ku bakuzi nu amukasile lutanuno, buno bukatizio bweinyu nu kilemanizio kyeinyu bibe ku Kalaga.
22 Mwasila kwengia mitima zeinyu ku kwanza bulili buno mube na lutundo luteli na bwengelezi ku mibuto zeinyu, tundanazi nunse bweinyubweinyu na mutima unsania, 23 kubuno mwabutilwe lingo, ta ku mbuto za kubiga, tondo ku mbuto ziteli za kubiga, ku idagi lya Kalaga lili na kalamo nu litanakuzinda. 24 Kubuno masanzo makutenda bunee:
“Mubili na mubili guli anga kisugu,
Nu lutanuno lwage lunsania luli anga iduba lya kisugu.
Kisugu kikuma, nu iduba lyage nti lyakoloka.”
25 Tondo idagi lya Mukota talinakuzinda. Nu idagi lilino u limwasambedwe mu Musagu Musoga.