Ikozi Lili na Kalamo nu Kilongo Kysililila
2
1 Umpanga, sigazi bubi bunsania nu bwengelezi bunsania, nu bukanga nu lugi, nu kukandika kunsania, 2 Mube anga bana beikili tulenge, tundazi mabele masoga nunse ma mutima buno kumo mukule mu lonio, 3 ndi mwasondile buno Mukota eli musoga nunse. 4 Sigelelazi bwigi nage, Ikozi lili na kalamo, lyasombilwe na bantu, tondo lyasombwedwe na Kalaga nu lili lya bukunza bubibu lwabusio lwage; 5 nu inyuwe mubenyene, anga makozi makulama, mukobaka buno mube numba za Muuza, nu busankoga bwasililila, ku kukasana binsania bya mutima, bikutananizia Kalaga mu Yesu Kristo. 6 Kubuno masanzo makutenda bunee:
“Lola, nabika ikozi lya kapindapinda mu Sayuni,
Lyasombwedwe, nu lya bukunza bubibu;
Nu wozo walikatizia nti ntakaba na nsoni.” a
7 Umpanga, ku beinyuwe bakatizia, ikozi lili lya lutanuno. Tondo ku batakatizia lili,
“Ikozi lyasombagwa na bobaki
Lyabede ikozi inene lya kapindapinda.” b
8 Nu lingo lili,
“Ikozi lya kwikuka kulyo,
Nu lwanda lwa kugusia.”
Bakwikuka kulyo kubuno bakunana kukatizia idagi, nu ku bubo u kubabikilwe. c
9 Tondo inyuwe, muli kibuti kyasombwedwe, nu busankoga bwa bukota, nu kilongo kyasililila, nu bantu babikilwe ku Kalaga wenyene, buno musambale lutanuno lwa wozo wamumanine kutuka mu kapilo nu kwingila mu kyengi kyage kya kwangamia, 10 inyuwe tamwabezaga kilongo wakalazi, nu kano kaluma museli bantu ba Kalaga, inyuwe tamwakwilidwe kyombo, tondo kano kaluma muse mwakwilwa kyombo.
Kulama Anga Bakiti ba Kalaga
11 Batundwa bane, nkumusega nunse buno, anga bageni nu bantu beli mu lugendo ga kisi, mwibembukye na ntundo za mubili zikulwana bita na mutima. 12 Mube na misako misoga munkatini mwa batakatizia, buno aba kuko kubakumukandika anga bakiti ba bubi, bamone ku misako zeinyu misoga nu baganune Kalaga ku busi bwa kuvwa kwage.
13 Anzazi bwangato bunsania bwabikwa munkatini mwa bantu, ku kabamba ka mukota, aba ndi eli mukota wa mwangati munene, 14 aba ndi beli bakota bakusingwa nage buno basungie bakiti ba bubi nu kuganuna bantu bakukita busoga. 15 Kubuno kuli kusombola kwa Kalaga buno ku kukita busoga, mwikazie bikongolo nu bateizi kampa kibibi, 16 anga bakandulwa, tondo tamukite bukandulwa bweinyu ku kukukila bwagi, tondo mukite anga bakiti ba Kalaga. 17 Kutyazi bantu bansania, tundazi mibuto zeinyu bakatizia, mukue Kalaga boba; anzazi mukota munene.
Kalolesio ka Nsungio za Kristo
18 Bakiti, anzazi bakota beinyu na boba bunsania, ta ku babo beli basoga nu babota tugu, tondo nu ku babo beli bakali. 19 Kubuno buli busoga kwikalila nsungio ku kabamba ka kalenganio kasoga ku Kalaga ndi muntu akusungibwa ku buteisanana. 20 Kubuno buli kuganuna kukizi ku kwikalila gamukwaga nu kulibulwa ngizi? Tondo ndi mwakita busoga nu mwikalila lusungio, bubo buli busoga nunse ku Kalaga. 21 Nu ku bubo u kumwamaninwe, kubuno Kristo nu We asungizibwe ku kabamba keinyu, amusigide kalolesio buno muyange binyantilo bya masomoneno mage, 22 We utakitile bwagi bwampa, nu mu kanua kage tamwatukile nunse kitondo kyampa kya bwengelezi; 23 We walingilwe, ntasubizie bilingano byampa, wasungizibwe, ntasalimizie muntu, tondo eikasenne ku wozo ukusungia mu bwisanana; 24 We wenyene atikizye bwagi bweitu mu mubili wage ku muti, buno tube bakuzi ku bwagi bweitu nu tulame ku kwisanana; nu ku kulibulwa kwage mwonezibwe. 25 Kubuno mwabezaga anga mikoko zazimina. Tondo kano kaluma mwasubya ku Mulangi nu ku Mukuluzi wa mitima zeinyu.