2 PETRO
Kusambizania
1
1 Simoni Petro, mukiti nu musingwa wa Yesu Kristo, ku babo bakasilwe bukatizio gamozi n'iswe, bwa bukunza bubibu nunse, ku kwisanana kwa Kalaga weitu nu kwa Monia Yesu Kristo: 2 Mponga nu bubobelelo bitile kutalikwa kumuli mu bumenyinino bwa Kalaga nu bwa Yesu Mukota weitu! Mubila nu Kusombola kwa Kalaga
3 Bwangato bwa buKalaga bwage bwatukasile binsania bya kalamo nu bya misako zage nunsania, ku bumenyinino bwa wozo watumanine ku lutanuno lwage nu ku busoga bwage wenyene; 4 ku bitondo bibino atukasile malagano manene nu ma bukunza bubibu, buno kumo mube bantu bagomia na misako za buKalaga, nu mwonibwe na kubiga kuli mu kisi mu ntundo zakyo. 5 Ku kabamba kako lingo, kitazi magala meinyu mansania buno mutalike busoga ku bukatizio bweinyu, nu ku busoga mutalike bumenyinino, 6 ku bumenyinino mutalike kola, nu ku kola mutalike kwikalila, nu ku kwikalila mutalike kwisanana, 7 ku kwisanana, mutalike lutundo lwa mibuto, nu ku lutundo lwa mibuto mutalike lutundo lwa Kristo. 8 Kubuno ndi bitondo bibino bili mu muli, nu bikwitila kuba byingi, tabyamusige geteli mulimo aba geteli kukolama biguma ku bumenyinino bwa Mukota weitu Yesu Kristo. 9 Tondo wozo uteli na bitondo bibino eli kyuku, ntakumona bya bulazi, nu nti eibilide buno engezibwe ku bwagi bwage bwa wakalazi.
10 Ku bubuno, mibuto, kitazi magala nunse buno mulindie mubila weinyu nu kusombolwa kweinyu; kubuno, ndi mukukita bubo, nti tamunakikitanwa nunse. 11 Ku bubuno, mwitabizibwe nunse kwingila mu bukota butanakuzinda bwa Mukota nu Monia weitu Yesu Kristo.
12 Ukinsa nili kayikayika kumukengelezia bitondo bibino bindi binsania, aba buno mubizi nu buno mwalindibwa nunse kano kaluma mu bulili. 13 Nu nkukengela buno buli busoga kumukengelezia, nkungu zinikili mu mubili wono, 14 kubuno nizi buno kutuka kwane mugo kuseli bwigi, anga bwandolesizie Mukota weitu Yesu Kristo. 15 Tondo nakite magala mane mansania buno mukengele bitondo bibino bindi binsania kumbusa kwa kukua kwane.
Babo Bamonine ku Lutanuno lwa Kristo
16 Kubuno, ta ku kuyanga misumo zakitilwe ku bwengelezi ukinsa twamulolesizie magala nu kuvwa kwa Mukota Yesu Kristo, tondo twamonine nunse ku lutanuno lwage na meiso meitu. 17 Kubuno akasilwe lwanzo nu lutanuno kutuka ku Kalaga Isi, gongule ku iyuki lyatukile ku lutanuno lunene, lyatendaga bunee: “Wono eli Mwana wane mutundwa, wantananizia.” 18 Nu tungule ku iyuki lilino kutuka mwigulu, gatwabezaga gamozi nage ku mwiduko wasililila.
19 Nu iswe tuli n'idagi lya bulengania, lyakokomezibwa nunse, nu mwatunganana kulilanga anga kasuku kakusana mu kiziki kili na kapilo, aaba nu kubasa kwa busi nu lukenikeni lwa nindunindu lusane mu mitima zeinyu; 20 menyazi tanga buno takuli bulengania bumozi mu Masanzo, bunavwama kwisulwa anga bukutunda muntu kisiembe, 21 kubuno ta ku lutundo lwa muntu ukinsa bulengania bwalusizibwe, tondo bantu batendile byatukaga ku Kalaga basondelezibwa na Muuza Wasililila.