Kulanga Kibombo kya Kalaga
5
1 Nkusengezia bakulu beli munkatini mweinyu; nne mukulu munyabo, mulongeki wa nsungio za Kristo, nu wagomia na lutanuno lwalolesibwe; 2 langazi kibombo kya Kalaga kimwemanina, ta ku kusindika, tondo ku lutundo, anga bukutunda Kalaga; ta ku kwelama mutali guli nsese, tondo ku mutima musoga mu mulimo; 3 ta anga bangati ba babo bamwakasilwe, tondo mube kalolesio ka Kristo ku kikyo kibombo. 4 Nu gakamoneka ku Mulangi Munene, mukakaswa lukalilo lwa lutanuno zitanakubiga. 5 Ububo nu inyuwe beli basikila, isiguliziazi ku bakulu. Nu inyuwe bansania mwibotye, mukitilane; kubuno Kalaga akusombaga beli na lwikotio, tondo akukasa bakwibotya mponga. 6 Umpanga, ibotyazi kunsi kwa kuboko kwa Kalaga kuli na magala, buno amusakike mu nkungu zaswaga; 7 nu bikazi tubebe tweinyu tunsania kweli, kubuno wenyene akumulanga.
8 Idangazi, kesiazi ntende, mwiti weinyu, Satana, akutimba anga nsimba zikuzuga, akulonda muntu kumuli buno zimulie. 9 Nu inyuwe mumukinde na bukatizio bwalinda, menyazi buno lusungio lwa lukita anga lulo luli ku mibuto zeinyu zabalangenne mu kisi. 10 Nu Kalaga wa mponga insania, wamumanine mu Yesu Kristo ku lutanuno lwage lutanakuzinda, gamwasilile kusungibwa ku nkungu nkeke, We wenyene amusililizie, amukase magala, amugugumanie. 11 Kweli kube magala ku nkiko na nkiko zitanakuzinda! Amena!
Kusambizania Kuzinda
12 Ku kusanza kwa Silvano, mubuto weitu, mukatizia anga bunkumona, namusanzila bitondo bimozi bikeke buno nimwane nu kumulongekela, buno mponga za Kalaga zimuli muzo zili za bulili. Lindazi nunse muzo.