Bitondo Bya Wakalazi Byatingile
4
1 Umpanga, kubuno Kristo asungizibwe ku mubili, nu inyuwe agatazi ngabo za mamo makengelo mamozi. Kubuno wozo wasungizibwe ku mubili, alekanukile na bwagi, 2 mu nkungu zasigala kulama ku mubili, alame ta anga ntundo mbi za bantu, tondo ku kusombola kwa Kalaga. 3 Kubuno, nkungu zatingile zakuka ku kukita bukutunda baBilongo, nu kutabanga mu butazi, nu mu ntundo mbi, nu mu kunua nunse maku; nu mu buliagundu nu mu kukumbamina nkisi. 4 Ububo, bakwangama buno tamukwenda nabo mu zezo misako zitaswaga, nu nti bakumulinga. 5 Bakasambala bunsania ku wozo uli kayikayika kusungia balami nu bakuzi. 6 Kubuno Musagu Musoga nu go, wasambedwe ku bakuzi buno basungibwe ku mubili anga bukusungibwa bantu, tondo balame mu Muuza anga bukulamaga Kalaga. Bakiti Basoga Bakulanga Nkaso za Kalaga
7 Kuzinda kwa bitondo binsania kuseli bwigi. Umpanga mube na menge nu mukokomene mu masego. 8 Lwabusio lwa bitondo binsania, mutundane nunse bweinyubweinyu kubuno lutundo lukukukila bwagi bwingi nunse. 9 Sekelanazi bweinyubweinyu geteli manungunungu. 10 Nawe nawe nagukitila bango geigezye lukaso lwakasilwe, anga balangi basoga ba mponga za Kalaga za nkita na nkita. 11 Ndi muntu umozi akusambala, nti asambale anga wozo ukutenda lebelebe malagi ma Kalaga; ndi muntu umozi akukitila bango, abakitile na menge makukaswa na Kalaga; buno mu bitondo binsania, Kalaga aganunwe mu Yesu Kristo, kweli kuli lutanuno nu magala matanakuzinda. Amena.
Kusungibwa ku Kabamba ka BuKristo
12 Batundwa, tamwangame ku idindiko lya keiya lili munkatini mweinyu buno limugeleke, anga buno mwabasidwe na kitondo kimozi kya kwangamia nunse. 13 Tondo bogazibogazi ku mulimo u muli nago ku kusungibwa kwa Kristo, buno mube nu inyuwe na mbogimbogi nunse mu nkungu zikalolesibwa lutanuno lwage. 14 Ndi mwasungibwa ku kabamba k'izina lya Kristo, nti muli na mbogimbogi, kubuno Muuza wa lutanuno, Muuza wa Kalaga eikala gantata geinyu. 15 Kubuno muntu umozi wa kumuli ntasungibwe anga mwiti, aba anga mwibi, aba anga mukiti wa bubi, aba anga muntu ukwiyingizia mu bitondo bya bango bantu. 16 Tondo ndi muntu akusungibwa buno eli muKristo, ntabe na nsoni ku bubo, tondo aganune Kalaga ku kabamba k'izina lilino.
17 Kubuno nkungu za lusungio zakuka, kulinga tanga na bantu ba kikanga kya Kalaga. Nu ndi lwalinga ku beiswe, nti buni bukaba kuzinda kwa babo batakwanza Musagu Musoga wa Kalaga? 18 Anga bukutenda masanzo bunee:
“Nu ndi wozo wisanana onibwa gasongo,
Buni bukonibwa wozo utakatizia nu mwagi?”
19 Ububo babo bakusungibwa ku kusombola kwa Kalaga babike tulamo twabo ku Mubumbi mukatizia, mu kukita busoga.