YAKOBO
Kusambizania
1
1 Yakobo, mukiti wa Kalaga nu wa Mukota Yesu Kristo, ku bilongo ikumi nu bibili byabalangenne, samba kumuli. Bukatizio nu Menge
2 Mibuto zane, mubogeboge nunse gamukulindikwa na malindiko ma lukita na lukita; 3 menyazi buno kulindikwa kwa bukatizio bweinyu kukulusia nkiki. 4 Tondo bwatunganana buno nkiki zizindilizie nunse mulimo wazo, buno mube basililila nu bazindilila geteli kwida kena. 5 Tondo ndi umozi wa kumuli eida menge amasege ku Kalaga, ukukasanaga ku bansania buliabulia geteli kuzuga, nu we akaswe. 6 Tondo amasege na bukatizio, geteli myango; kubuno wozo uli na myango, asusanania na kimpumi kya kitatenge, kikutengibwatengibwa na lumpumpu nu kikusindikwa nako nako. 7 Kubuno wozo muntu ntakengele buno akakaswa kena na Mukota; 8 kubuno, muntu uli na mitima ibili, akuzangazanga mu nzila zage insania.
Buzambi nu Bugumi
9 Tondo mubuto wabota, abogeboge kubuno Kalaga amusakike; 10 Nu mugumi, abogeboge kubuno akegibwe; kubuno akatinga anga iduba lya kisugu likukoloka. 11 Kungwa musi wabasa na muzuzo mukali, nu komia bisugu, maluba mabyo nti makoloka, nu mulangalo wamo nti wazimina: anga bubo mugumi akazimina mu misako zage insania.
Migeleko nu Malindiko
12 Mbogimbogi ku wozo muntu ukukinda mu malindiko; kubuno kungwa asila kulindikwa, nti akakaswa lukalilo lwa kalamo, lwalagile Mukota ku babo bakumutunda. 13 Ndi muntu akulindikwa, ntatende bunee: “Nkulindikwa na Kalaga;” kubuno Kalaga ntanalindikwa na bubi, aba We wenyene ntanalindika muntu ku bubi. 14 Tondo na muntu na muntu akulindikwa gaakulutwa nu kwengelelwa na lutundo lwage wenyene. 15 Kungwa lutundo lwitila, nti lwabuta bwagi; nu bubo bwagi nu bo kungwa bwitila, nti bwabuta lukuo.
16 Mibuto zane, tamwengelelwe, batundwa. 17 Lukaso lunsania lusoga nu lukaso lunsania lwasililila lukutukaga kwigulu, ku Isi wa kyengi, nu We ntanagaluka nunse anga kilimelime kikugalukagaluka. 18 Ku kusombola kwage wenyene, atubutile ku idagi lya bulili, buno tube lukita lwa bibumbwa byage bitangi.
Kungwa nu Kukita
19 Umpanga, mibuto zane batundwa, mwizi kitondo kikino. Buno na muntu na muntu asasie kungwa, tondo ntasasie kutenda, nu ntasasie kongoa: 20 kubuno bongoa bwa muntu tabukuzindilizia kwisanana kwa Kalaga. 21 Umpanga, sigazi nsese insania nu bubi bwitila bwingi, sekelazi idagi ku kubota lyabikilwe mumuli, nu linavwama konia mitima zeinyu.
22 Mube bakiti b'idagi, tondo tamube bongwilizi tugu, munavwa kwiyengelela mubenyene. 23 Kubuno, ndi muntu eli mungwilizi w'idagi tugu nu ntakulikita, nti muntu wono asusanania na muntu ukwidola meiso mage mu kiyolo, 24 nu kusila kwidola nti enda, nu ku nkungu zezo nti eibilila bweimonagako.
25 Tondo wozo ukusongolola mulembe wasililila gukulusia bukandulwa, nu kugukita, ntabe mwibilizi wa byakungwa kubyo, tondo mukiti wa mulimo, nu we nti abogeboge mu mulimo wage.
26 Ndi muntu umozi wa kumuli akukengela buno eli na meigisia, nu we ntakwisungula mu kutenda, nti akwiyengelela, nu nti meigisia ma muntu wono meli ma buliabulia. 27 Meigisia masoga nunse nu meteli na nsese lwabusio lwa Kalaga Tateiswe, u mamano, kutabangila nkubi nu misigala mu tubebe twabo, nu kwidanga na bitondo bibi bya kisi.