Lukita lwa Kutananizia Kalaga
13
1 Tundanazi anga mibuto. 2 Tamwibilile kusekela bageni, kubuno mu kukita bubo bango basekede banzelo geteli kumenya. 3 Kengelazi bakandwa anga buno mwakandwa gamozi nabo, nu babo bakubabazibwa, anga buno mukubabazibwa gamozi nabo mu mubili. 4 Isonga lyanzwe na bantu bansania, nu mugu uswage, kubuno Kalaga asungie bitazi nu beiti ba meiga. 5 Tamwelame bikulo; mubogeboge na bibyo bimuli nabyo; kubuno Kalaga wenyene abwide bunee: “Nsikakusiga aba nsikalekanuka nobe.” a 6 Bubo tunavwama kutenda na kilemanizio bunee:
“Mukota eli mukasia wane,
nsikakua kampa boba.
Kikizi kinankitila muntu?” b
7 Kengelazi basondelezia beinyu babo bamusambalide idagi lya Kalaga; nu kulola buni bwabezaga kuzinda kwa tulamo twabo, nu muyange bukatizio bwabo. 8 Yesu Kristo eli bumozi kankanka walubi, lelo, nu utanakuzinda. 9 Tamuzangibwezangibwe na meigisia mageni ma nkita na nkita; kubuno buli busoga buno mutima ulindibwe na mponga, ta ku idia, kubuno talyabede na mutali ku babo baliyangile.
10 Tuli na kayulo katatunganana kulia ku babo basankoga bakukita mulimo mu Numba za Hema. 11 Mikila za nyama zekagwa na sankoga munene mu Kiziki Kyasililila ku kabamba ka bwagi, tondo mibili zazo zagisibagwa ku isula lya mwino. 12 Ku kabamba kakano Yesu nu We ababazizibwe ku isula lya mwino buno aswagie bantu bage na mikila zage wenyene. 13 Umpanga, twendazi kweli ku isula lya mwino nu kubengwa anga bwabengilwe. 14 Kubuno gano ga kisi tatuli na mwino wa kwizizia bindi binsania, tondo tukulonda wozo ukavwa. 15 Mweli, tukase Kalaga kisansa kya lutanuno bindi binsania, ukutenda buno, kiguma kya milomo zikutekula bwasibwasi izina lyage. 16 Nu tamwibilile kukita busoga nu kukasa bango bantu, kubuno Kalaga akutananizibwa na bisansa bili anga bibino.
17 Anzazi basondelezia beinyu nu mwisigulizie kubo, kubuno bakulola nunse mitima zeinyu anga bantu batunganana kusambala musagu buno bakite bubo ku mbogimbogi, aba ta ku kwinia mutima, kubuno ku kukita bubuno tabunamubela na mutali wampa.
18 Mutusegele, kubuno tukukatizia buno tuli na bumenyinino busoga, nu tukutunda kukita busoga mu bitondo binsania. 19 Nu nne nkumusega nunse mukite bubo buno nisasie kusubya kweinyu.
Masego
20 Umpanga, Kalaga wa bubobelelo, wayukizie Mulangi munene wa mikoko kutuka ku bakuzi, u Mukota weitu Yesu, na mikila z'idagano litanakuzinda 21 amuvwamie mu bitondo binsania bisoga kuzindilizia lutundo lwage; nu We akite mumuli bwamutananizia mu Yesu Kristo, uli na lutanuno ku nkiko na nkiko zitanakuzinda. Amena.
22 Mibuto zane, nkumusega nunse buno, mwikalile bitondo bibino bya kugugumania kubuno namusanzide ku bitondo bikeke tugu. 23 Menyazi buno mubuto weitu Timoteo es'akandulwa; nu ndi asasia kuvwa nti nende gamozi nage kumumonako.
24 Musambizie basondelezia beinyu bansania nu basililila bansania. Babo ba ku Italia bamusambizia.
25 Mponga zibe gamozi n'inyuwe bansania! Amena!