Kalaga Tateiswe
12
1 Umpanga iswe, kubuno twatimbwa na musanganano munene wa balongeki, twikye muzigo na muzigo, nu bwagi bwatukanda yiliyili nu twitume lubilo na nkiki mu kantangoa katuli nako, 2 tulolazi nunse ku Yesu, Mukota mulingia nu musililizia wa bukatizio bweitu, ku kabamba ka mbogimbogi zabikidwe lwabusio lwage, eikalide mbabazio za musalaba; ntabede na nsoni, nu eikede ku kuboko kwa seidume kwa kisumbi kya bukota kya Kalaga. 3 Umpanga kengelazi nunse wozo wikalide myango minene anga zeno za beiya bwagi buno tamukutwe nu tamutambe nunse mu mitima zeinyu.
4 Tamukita bita nu kubasibwa mikila, mu kulwana na bwagi. 5 Nu mwasila kwibilila bitondo bimwanagwa anga bukwanagwa bana bunee:
“Mwana wane, ntubenge lusungu lwa Mukota,
Aaba ntutambe kungwa akukuzugila;
6 Kubuno Mukota akusungula wozo waakutunda,
Nu akususulaga muntu na muntu wizi buno eli mwana wage.” a
7 Lindazi ku lusungu lwa Kalaga, nu nti amukitile anga bana bage; kubuno nazi mwana utakususulagwa n'isi? 8 Tondo ndi tamukusungulwa anga bukusungulagwa bana bansania, umpanga kasi nti muli bana ba butazi, tondo ta bana ba lebelebe. 9 Nu mwizi nunse buno twabezaga na batateiswe batubuta ku mubili, nu batusungulaga nu twabanzaga, umpanga ndi tabunakulungana nunse twisigulizie ku Tateiswe wa mutima nu nti twabe na kalamo? 10 Batateiswe batusungwide ku bindi bimozi bikeke anga bubamonine buno buli busoga; tondo Kalaga akutusungulaga buno tube na mutali nu buno tusililile anga bwasililila. 11 Buligo buno na lusungu na lusungu lukulinga tanga kumoneka buno lukwinia mutima, nu talukubogiabogia; tondo kumbusa nti lukukolamia biguma bisanana nu bya bubobelelo ku babo bakusungulwa nalo.
Makakizio nu Kutondwa
12 Ku bubuno, lindiazi maboko meinyu makoloboka nu mazu meinyu matamba. b 13 Nu isiazi nzila za magulu meinyu, buno wozo uli kitunga anavwa kwiba nzila tondo onibwe.
14 Mube na bubobelelo na bantu bansania, nu musililile, geteli bubuno takuli muntu wampa wamone ku Mukota. 15 Lolazi busoga nunse buno muntu wampa nteide mponga za Kalaga; nu mwizi wampa guli lubaba tawase aba kutempula buno unavwa kulusia mulubu nu kubigia bantu beingi, 16 nu munkatini mweinyu takube kitazi, aba utakwanza Kalaga anga Esau, wozo wakunzizie bupieni bwa bukulu bwage ku kabamba k'idia ikeke tugu. 17 Mwizi nunse buno, gaatundile kupiena mponga zezo, asombilwe; aba azisegile na bisozi; kubuno tabunakulungenne lingo buno isi agalukye makengelo.
18 Kubuno tamwakundile ku mwiduko unitubibwa kugo, wabezaga ukugulumina keiya, nu lutundutundu lwina, nu kapilo, nu kisoa, 19 Nu iyuki lya monze, nu iyuki likutenda malagi; nu babo bongwaga ku bubo basegile buno tabanungwa lingo ku moki mamo; 20 kubuno tabavwamine kwikalila idagi libakakizizibwe; “Aaba ndi nyama zitubya ku wozo mwiduko nti zitwa na makozi.” c 21 Nu bubo bwitizie bantu boba nunse, aaba nu Musa atendile bunee: “Nili na boba nu nkugilimina.”
22 Tondo inyuwe museli bwigi nunse na mwiduko wa Sayuni, nu mwino wa Kalaga uli mulami, u Yerusalema wa mwigulu, nu mukundamano wa mbogimbogi wa banzelo tununu na tununu, 23 nu ku musanganano munene wa bantu balingile kubutwa u babo meina mabo masanzilwe mwigulu, nu ku Kalaga uli ngatu wa bantu bansania, nu ku myuza za bantu beisanana basililizibwe, 24 nu ku Yesu uli mukulumania w'idagano ito, nu mikila za kusandilwa zikutenda busoga nunse kutinga mikila zezo za Abeli.
25 Idangazi buno tamusombe kungwilila wozo ukutenda, kubuno ndi babo basombile kungwilila wozo wasambalaga misagu za Kalaga ga kisi tabonine, embe iswe, ndi twasomba wozo ukututenda kutuka mwigulu. 26 Wakalazi iyuki lyage lyatengezie kisi, tondo kano kaluma alagile bunee: “Nkatengia lingo limbizi, ta kisi tugu, tondo nu igulu.” 27 Bitondo bibino, “lingo limbizi,” bikulolesia buno kugalukibwa kwa bintu binavwama kutengibwatengibwa anga bintu byabumbilwe, buno bintu bitanavwama kutengibwatengibwa bikale. d