Bukatizio
11
1 Umpanga, bukatizio buli kilemanizio kya bibyo bikulemaninwa, bumenyinino bwa bibyo bitemonekako. 2 Kubuno ku kabamba kakano bakulu ba wakalazi balongekedwe busoga. 3 Ku bukatizio twizi buno kisi kyabumbilwe ku idagi lya Kalaga, aba bintu bikumonekako tabyakitilwe ku bintu bikumonekako.
4 Ku bukatizio, Abeli akasenne kisansa kisoga nunse ku Kalaga kutinga kikyo kya Kaina; ku bukatizio alongekedwe buno eli wisanana kubuno Kalaga eitabizizie kisansa kyage. Nu ku bubo bukatizio bwage, aba akule, tondo eki atenda.
5 Ku bukatizio, Enoke azanzwidwe buno ntakue, nu ntamonekileko lingo, kubuno Kalaga amuzanzwide. Lwabusio lwa kuzanzulwa kwage, alongekedwe buno abezaga atananizia Kalaga. 6 Tondo geteli bukatizio, tabunakulungana kumutananizia, kubuno muntu ukukunda ku Kalaga atunganana kukatizia buno We eligo, nu akukasana lukalilo ku babo bakumulonda.
7 Ku bukatizio Noa, gaasilile kutondwa na Kalaga bitondo byabezaga tabimonekako lingo, nu kukua Kalaga boba, obakile safina buno onie kikanga kyage; kubo asungizie kisi, nu abede mupieni wa kwisanana kuli mu bukatizio.
8 Ku bukatizio, Abrahamu mu nkungu zamaninwe, anzile nu endile ku kisi kyakapiena nu endile nteizi kwa kwenda. 9 Ku bukatizio, avule kwikala mu kisi kyalagilwe anga kisi kiteli kyabo; eikalaga mu numba za hema gamozi na Isaka nu Yakobo, bapieni ba lilyo idagano gamozi nage. 10 Alindilaga mwino guli na bibanza byagugumana, wozo mobaki nu mukiti wago u Kalaga.
11 Ku bukatizio, Sara wenyene, gaabezaga eseli mukungu nunse, ekile iyimi kubuno akatizizie wozo wamukasile idagano lilyo. 12 Ku kabamba kako muntu umozi nu we abezaga eseli anga mukuzi, abutile bantu beingi anga nkeninkeni za kwigulu, nu anga misege zili ku mutili wa kitatenge zitanavwamwa kuganzwa.
13 Mu bukatizio u mwakule babo bansania, geteli kumona mamo malagano, tondo bamamonineko nu bamasekede gamabezaga bulazi nu bamenyine buno babezaga bageni nu benzi mu kisi. 14 Babo bakutenda bubo bakulolesia buno bakulonda kisi kyabo. 15 Songo bakengede kikyo kisi kibatukile kukyo, songo banasubizie kukyo lingo. 16 Tondo kano kaluma bakutunda kumona kisi kisoga nunse, u kikyo kya mwigulu. Ku kabamba kakano Kalaga nteli na nsoni kumanwa buno Kalaga wabo, kubuno abobakide mwino. a
17 Ku bukatizio Abrahamu, we wakasilwe idagano, akasenne Isaka buno abe kisansa mu nkungu zalindikilwe, nu abezaga kayikayika kukasana mwana wage wa ngomo, 18 u wozo wabwidwe bunee: “Mu Isaka u mukamanwa kibuti kyobe.” 19 Akengede buno Kalaga eli na magala ma kuyukya bakuzi, nu amumonine lingo anga mu kisusania kya kuyuka kutuka ku bakuzi.
20 Ku bukatizio, Isaka akasile Yakobo nu Esau mponga ku bitondo bikavwa.
21 Ku bukatizio Yakobo, gaabezaga eseli bwigi na kukua, akasenne mponga ku mwana na mwana wa Yosefu. Nu akumbaminne Kalaga ku kwegamina ku ntonga za musumbo wage.
22 Ku bukatizio Yosefu, gaabezaga bwigi na kukua, kwa kalamo atendile bukatuka bana ba Israeli ku kisi kya Misri nu abakakizizie kwenda na makwa mage.
23 Ku bukatizio, gabutilwe Musa, babuti bage bamubisile myezi isatu kubuno bamonine buno mwana abezaga musoga, nu tabakule ikakizio lya Mukota boba.
24 Ku bukatizio, Musa gaabezaga eseli muntu mukulu munene, asombile kumanwa buno mwana wa mukinga wa Farao. 25 Amonine buno buli busoga kubabazibwa gamozi na bantu ba Kalaga kutinga kwibogiabogia mu bwagi ku nkungu nkeke. 26 Akengede buno kubengwa anga bukubengwa Kristo buli iguma inene nunse kutinga isuku lya bugumi bunene bwa bintu bya ku Misri, kubuno abezaga na kilemanizio kya lukalilo.
27 Ku bukatizio, atukile ku Misri ntakule bongoa bwa mukota boba, kubuno alindizie mutima anga muntu ukumona ku wozo utakumonekako. 28 Ku bukatizio akitile Kisansa ky'Isuluko nu kusandila mikila buno wozo ukuzikya nkula nteitubye ku nkula za baIsraeli.
29 Ku bukatizio basokile Kitatenge Kyakisimana anga kiziki kyakama, tondo baMisri gabagelekile kutinga, bakule mu mazi.
30 Ku bukatizio bitutu bya Yeriko byagwede, gabyasilile kutimbwa bindi mutubakamo. 31 Ku bukatizio, Rahaba, wozo kitazi, ntakule gamozi na babo banani, kubuno asekede batitiki na bubobelelo.
32 Nu nitende buni lingo? Kubuno nida nkungu za kusambala misagu za Gideoni, nu Baraka, nu Samsoni, nu Yefuta, nu Davidi, nu Samweli nu za balengania, 33 ku bukatizio babo bakindile makota, nu bakitile bwisanana, nu bamonine bibalagilwe, nu bakandile tunua twa nsimba, 34 nu bazimizie magala ma keiya, nu bonine kukua na mwene wa nganda, nu batambaga na nsambo tondo bonine nu kuba na magala, nu babede mapuka ku bita, nu bakindile mayombo ma bageni.
35 Bakikulu bamonine lingo ku bakuzi babo bayukizibwe; tondo bango bababazizibwe bubibu nunse nu tabazigile kukandulwa buno babe n'iyukilo isoga nunse; 36 buno bango balindikwe, beililikilwe nu kususulwa, aaba nu kukandwa na makoki nu kubikwa mu kikando; 37 nu balibwidwe makozi; nu basesilwe na misumeno; nu beitilwe na mwene wa nganda, nu bendaga batimbatimba kuko nu kuko, bavwala bikuku bya mikoko nu bikuku bya mpene, nu beidaga binsania, nu bababazizibwe, nu bakitilwe bubi. 38 Bantu ba kisi tabatananizibwe nabo babezaga bakutimbatimba mu kalula nu mu miduko, mu matengu ma tulimba nu mu milumba za munsi.