10
1 Umpanga, mulembe guli kisusania kya bitondo bisoga bikavwa, tondo ta lebelebe bibyo bitondo byobyenyene. Nu ku kitondo kya bisansa bibakukasana ku mwaka na mwaka, tabinavwama kusililizia babo bakuvwa bwigi na Kalaga. 2 Songo bunabede bubo, banasigile kubikasana, kubuno babo bakukumbamina bubo, nti basila kwengibwa limbizi limozi, nu ndi tabanabede na kalenganio lingo ka bwagi bwabo? 3 Tondo ku bibyo bisansa, makengelo ma bwagi makusubya mwaka na mwaka, 4 kubuno tabunakulungana buno mikila za balume ba ngombe nu za mpene zitikye bwagi. 5 Ku bubuno nkungu zingide Kristo mu kisi, abwide bunee:
“Ntwatundile kisansa aba kayulo,
Tondo wankitide mubili.
6 Ntwatananizibwe na bisansa bya nyama zagisibwa aba bisansa bya bwagi.
7 Ububo natendile bunee: ‘Lola, navwa,
mu kigondi kya mukanda wa milembe u bwasanzilwe ku kabamba kane.
Navwa buno nikite kusombola kwobe, Kalaga.’” a
8 Alingile tanga kutenda bunee: “Ntwatundile nu ntwatananizibwe na bisansa aba na tuyulo, aba bisansa byagisibwa, aba na tuyulo ku kabamba ka bwagi.” (Bibyo byakasanagwa anga bwakakizizibwe ku mulembe). 9 Abwide lingo bunee: “Lola, navwa kukita kusombola kwobe.” Atikizye idagano itangi buno eimike idagano lya mabili. 10 Mu kusombola kukuno twasililizizibwe ku kwikasana mubili kwikasenne Yesu Kristo limbizi limozi tugu.
11 Nu na sankoga na sankoga na ukwemana busi na busi kukita mulimo wage nu mambizi meingi akukasanaga bisansa bibyo bitanavwama nunse kutikya bwagi, 12 tondo We, nkungu zasilile kukasana kisansa limbizi limozi kyakuka aaba nu kuzinda, ku misako za bwagi, eikede ku kuboko kwa seidume kwa Kalaga, 13 akulindila aaba nu gabikwe beiti bage kunsi kwa magulu mage. 14 Kubuno, ku kisansa kimozi, asililizie babo basililizibwe kutanakuzinda.
15 U bubo bukutulongekela lingo Muuza Wasililila, kubuno kusila kwa kutenda bunee:
16 “Lilino u idagano linkalagana nabo,
Kumbusa kwa bindi bibyo, u bukutenda Mukota:
Nabike milembe zane mu mitima zabo,
Nu nazisanze mu makengelo mabo.” b
17 Kusila atendile lingo bunee: “Nsikakengela lingo bwagi bwabo aba mibi zabo.” 18 Umpanga, gago geli isigililo lya bwagi, nti tageli lingo kingo kisansa kya bwagi.
Tukunde ku Kalaga
19 Umpanga, mibuto zane, ku kabamba ka mikila za Yesu, tuli na magala kwingila mu Kiziki Kyasililila, 20 ku nzila nto nu zikulama zakandulwa ku kabamba keitu, kutinga mu nsulu zalimba kikyo Kiziki Kyasililila, u mubili wage, 21 nu tuli na Sankoga Munene gantata ga numba za Kalaga.
22 Umpanga, tukunde ku Kalaga na mutima wa bulili ku kilemanizio kinsania ku bukatizio, mitima zengezibwa ku kusandilwa buno tusige kalenganio kabi, nu mibili zogezibwe na mazi menga nunse. 23 Tukokomezie nunse mulimo wa kilemanizio kyeitu, kubuno wozo walagile idagano eli wisanana. 24 Tulindanie bweitubweitu buno tube na lutundo nu makitilo masoga. 25 Tatulekele kukundamana gamozi, anga bukukitaga bango, tondo tukasane magala bweitubweitu, kwitila nunse anga bumukumona buno busi bubo buse bwigi.
26 Kubuno, ndi twakita lingo bwagi n'isela kumbusa kwa kuba na bumenyinino bwa bulili, takuli kingo kisansa ku kabamba ka bwagi, 27 tondo kuseli kubibu kwa lusungio nu bukali bwa keiya bukazikya babo basombi ba Kalaga. 28 Wozo wakagula mulembe wa Musa nti akua geteli kyombo, ku bulongeki bwa bantu babili aba basatu. 29 Mukukengela buni? Lusungio lukizi lwatananina wozo muntu wanyantile Mwana wa Kalaga, wanyegile mikila z'idagano zamusililizizie nu wabengile Muuza Wasililila wa mponga? 30 Kubuno twizi wozo watendile bunee: “Kusuba kuli kundi, kuliga kuli kundi!” c nu lingo: “Mukota akalindika bantu bage.” d 31 Buli bubibu nunse kukatwa mu maboko ma Kalaga mulami.
32 Tondo kengelazi bibyo bindi bitangi, gamwasanizibwe kyengi kya Kalaga, mwikalide bita bibibu mu mbabazio. 33 Mambizi mamozi, mwalingagwa nu kukitwa bubi lwabusio lwa bantu, nu mango mambizi mwagomezie na babo bakitagwa bubo.
34 Kubuno mwakwilide babo babezaga bakandwa kyombo, nu mwitabizizie na mbogimbogi kunyagwa bikulo byeinyu, kubuno mwamenyine buno muli na bikulo bisoga bikulama bindi binsania. 35 Umpanga, tamusige kilemanizio kyeinyu, kubuno kili na lukalilo lunene. 36 Kubuno mwatunganana kuba na nkiki, buno ndi mwasila kukita kusombola kwa Kalaga, nti mwakaswe kikyo kimwalagilwe, 37 anga bukutenda masanzo bunee:
“Kuse bindi bikeke,
Wozo watunganana kuvwa avwe,
Nu nteizizie.
38 Tondo wisanana wane akalama ku bukatizio;
Nu ndi asubya kumbusa, nti mutima wane taguli na
mbogimbogi nage.” e
39 Tondo beiswe, tatuli bantu bakusubya kumbusa nu kuzimina, tondo tuli gamozi na babo bakukatizia nu konibwa.