Meigisia ma ga Kisi nu Meigisia ma Mwigulu
9
1 Umpanga, idagano itangi lyabezaga na makakizio ku kukumbamina Kalaga, nu kiziki kyasililila kya ga kisi. 2 Kubuno mu numba za hema zimikilwe, mu busio butangi bwamanagwa Kiziki Kyasililila mwabezaga kyanikilo kya kasuku, nu meza, nu tumpampa twa kalolesio ku Kalaga. 3 Nu ku lisa lya nsulu z'ibili za kuziba, kwabezaga busio bwa numba za hema, bwamanagwa Kiziki Kyasililila Nunse. 4 Mu numba zezo mwabezaga kasenga ka olo gagisibagwa bulago, nu sanduku z'idagano, zakukilwa na olo ku ntungo insania. Mu sanduku zezo mwabezaga kibungulu kya olo kili na mana, nu musumbo wa Haruni wasaga maluba, nu mbavu z'idagano. 5 Nu gantata ga sanduku gabezaga makerubi ma lutanuno, makukilaga na byupi byamo na kisumbi kya kyombo, tondo tazili nkungu za kusambala kitondo na kitondo ku bibino kano kaluma. 6 Umpanga, gasilile kulongekwa bitondo bibino, basankoga bakukita milimo beingilaga mu nkungu insania ku busio butangi mu numba za hema kukita milimo zabo. 7 Tondo mu busio bwa mabili bwa numba za hema, sankoga munene wenyene tugu eingilaga kuko limbizi limozi ku mwaka, aba nteingilaga ndi nteli na mikila za kukasana ku kabamba kage wenyene nu ku kabamba ka bwagi bwa bango bantu. 8 Muuza Wasililila alolesagia kitondo kikyo buno nzila za kwingila mu Kiziki Kyasililila Nunse zabezaga tazikandulwa, gabezaga numba ntangi ziki zemana. 9 Keli kalolesio ka kano kaluma, bwisulilwa buli buno nkaso nu bisansa bikukasanwa ku Kalaga tabinavwama kusililizia kalenganio ka muntu ukukumbamina bubo, 10 kubuno bisansa bibyo bili makakizio ma mubili tugu, ku malia, nu bikunubwa, nu koga kwa nkita na nkita, byakakizizibwe aaba nu nkungu za kubigalukya kuba bito.
11 Tondo Kristo amonekile buno eli Sankoga Munene wa bitondo bisoga byabe; atingile mu numba nnene zasililila, zitobakilwe na maboko ma muntu, u kutenda buno tazili za kisi kikino; 12 nu eingide limbizi limozi tugu mu Kiziki Kyasililila Nunse, ta na mikila za mpene nu za byana bya ngombe, tondo na mikila zage wenyene, nu abede na bukuluzi butanakuzinda. 13 Kubuno ndi mikila za mpene nu za ngombe za mulume, nu lwito lwa ngombe z'ibuti lwabalangenne ku bantu beli na nsese, bikubaswagia, nu kubengia mubili. 14 Embe lino mikila za Kristo, ku Muuza utanakuzinda, eikasenne wenyene geteli itondoki ku Kalaga, zeno zinengia kalenganio keinyu, buno mukitile Kalaga mulami.
15 Ku kabamba kakano We eli mukulumania w'idagano ito, buno, lukuo lwabede ku kukulula bantu ku misako za bwagi zakitilwe kunsi kw'idagano itangi, babo bamaninwe buno babe n'idagano lya bupieni butanakuzinda.
16 Kubuno ndi kuli idagano, idagano lilyo linazindilila ndi wozo walilagaga akua. 17 Kubuno idagano lili na magala tugu ku nkungu za lukuo, kubuno talili na magala mampa ndi wozo mwiyalyo eikili na kalamo. 18 Ku kabamba kakano aba lilyo idagano itangi talyalingilwe geteli mikila. 19 Kubuno gasilile kutenda Musa makakizio mansania ma mulembe, lwabusio lwa bantu bansania, atolile mikila za byana bya ngombe nu za mpene gamozi na mazi nu myoza zakisimana nu hisopo, nu abisandide gantata ga kigondi kya mukanda kyenyene nu ku bantu bansania, 20 nu abwide bunee: “Zeno zili mikila z'idagano limwakakizizibwe na Kalaga buno mulilange.” a 21 U bubo lingo asandide mikila gantata ga hema nu gantata ga bintu binsania byakukasia ku kukumbamina. 22 Nu mu mulembe, bwigi na binsania byasugilwe na mikila, nu geteli kubasia mikila takunabede isigililo.
Kisansa kya Kristo Kikutikya Bwagi
23 Umpanga, bwatunganenne buno bisusania bya bili mwigulu byengibwe na bibino, tondo bili lebelebe mwigulu byatunganenne kwengibwa na bisansa bisoga nunse kutinga bibino. 24 Kubuno Kristo nteingide mu Kiziki Kyasililila kyimikilwe na maboko ma bantu, kili kisusania kya kikyo kya bulili, tondo eingide mwigulu lyolyenyene buno amoneke kano kaluma lwabusio lwa Kalaga ku kabamba keitu. 25 Nu nteingidemo buno eikasane wenyene mambizi meingi, anga bubo bwingilaga sankoga munene mu Kiziki Kyasililila mwaka na mwaka kukasana mikila ziteli zage; 26 songo bubo, bunatunganenne ababazibwe mambizi meingi kutukila kubumbwa kwa kisi; tondo kano kaluma, amonekile limbizi limozi tugu ku kuzinda kwa nkiko, buno azimie bwagi na kisansa kyage. 27 Nu anga bubo bwabikidwe bantu kukua limbizi limozi, kumbusa kwa bubo lusungio. 28 Ububo nu bo Kristo eikasenne limbizi limozi buno atikye bwagi bwa bantu beingi, nu akamoneka limbizi lya mabili, takukutikya bwagi lingo, tondo ku babo bakumulindila buno bonibwe.