Yesu, Sankoga weitu Munene
8
1 Kitondo kinene ku bibyo bitwasila kutenda kili buno tuli na Sankoga Munene wa lukita luluno, wikile ku kuboko kwa seidume kwa kisumbi kya bukota bunene mwigulu, 2 anga mukiti wa Kiziki Kyasililila nu wa hema za bulili zimikilwe na Mukota, tondo ta na muntu. 3 Kubuno na sankoga na sankoga munene akubikwa buno akasane nkaso nu bisansa, ububo bwatunganana buno wono abe na byakukasana. 4 Songo abezaga ga kisi, ntanabede sankoga, kubuno kuli basankoga bakukasana nkaso anga bukukakizia mulembe; 5 bakukita mulimo mu lukita nu kisusania kya bitondo bya mwigulu, anga bwalingile kusambalilwa Musa na Kalaga kwimika zezo numba za hema; kubuno atendile bunee: “Lola busoga, ukite binsania mu lukita nu kisusania kiwalolesizibwe gantata ga mwiduko.” a 6 Tondo kano kaluma Yesu ese na mulimo munene nunse kutinga, anga bweli mukulumania w'idagano isoga nunse, nu lyimikilwe gantata ga malagano masoga nunse.
7 Kubuno songo lilyo idagano itangi lyabezaga lyaswaga, songo takunabede kitondo kya kubika lingo lya mabili. 8 Kubuno amonine mutambo wa lilyo itangi, atendile bunee:
“Lolazi bindi bikuvwa, u bukutenda Mukota,
Gankalaga idagano ito na numba za Israeli
nu na numba za Yuda;
9 Talikaba anga idagano lilyo linalagile beisibo;
Ku busi bubo bunabakatile ga makoko
buno nibatikye ku kisi kya Misri,
Kubuno tabalangile nunse idagano lyane.
10 Tondo lola lilino u idagano linkalagana na numba za Israeli,
Kusila kwa bindi bibyo,” u bukutenda Mukota;
“Nabike milembe zane mu makengelo mabo,
Nu nazisanze mu mitima zabo;
Nu nne nabe Kalaga wabo,
Nu bo babe bantu bane,
11 Takukaba muntu wampa ukeigisia munyage,
Aba muntu wampa kwigisia mubuto wage,
nu kutenda bunee:
‘Umenye Mukota!’
Kubuno bansania bakammenya,
Kutukila ku mwana muto
aaba nu kwika ku mukulu munene.
12 Kubuno nkasigilila mibi zabo,
Nu nsikakengela lingo bwagi bwabo.” b
13 Nu ku kutenda bunee: ‘idagano ito,’ akitile idagano itangi kuba ikulu nu kikyo kili kikulu nu kise kyakunguka nti kise bwigi na kuzimina.