Melkisedeki Eli Mukota nu Sankoga
7
1 Kubuno wono Melkisedeki, mukota wa Salemu, sankoga wa Kalaga Wasakama Nunse akulumenne na Abrahamu gaatukaga kwakindaga bakota nu amukasile mponga, 2 nu Abrahamu amukasile kyindi ky'ikumi kya bintu binsania. Bwisulilwa bw'izina lyage, buli mukota wa kwisanana, lingo eli mukota wa Salemu, u kutenda buno, mukota wa bubobelelo. 3 Nteli n'isi, aba nina, aba kibuti, bindi byage tabili na kulinga aba kalamo kage takeli na kuzinda, tondo asusanizibwe na Mwana wa Kalaga. Wono Melkisedeki eli sankoga utanakuzinda. 4 Umpanga, lolazi lukita lwa wono muntu bwabede munene, wozo wakasilwe na Abrahamu tatanguluiswe kyindi ky'ikumi kya bibyo byanyagile. 5 Nu ku bana ba Lawi, babo bakukita mulimo wa busankoga, bakakizizibwe ku mulembe buno beli na bwangato bwa kutola kyindi ky'ikumi ku bantu, u kutenda buno ku mibuto zabo, aba batukile mu kibuti kya Abrahamu. 6 Nu we, utabezaga watuka mu kibuti kyabo, atolile kyindi ky'ikumi ku Abrahamu, nu amukasile mponga, wozo wabezaga na mamo malagano. 7 Tondo, takuli unakania ndi mwana muto akukaswa mponga na mukulu munene. 8 Nu gano, babo bakutola kyindi ky'ikumi, beli bantu bakukua, tondo, we u gukulongekelwa buno eli mulami. 9 Nu lingo, tunatenda buno Lawi, ukutola kyindi ky'ikumi, atikizye kyindi ky'ikumi mu Abrahamu, 10 kubuno abezaga eikili mu kibunda ky'isi, nkungu zakulumenne Melkisedeki na Abrahamu.
11 Umpanga ndi kusililila kwabezaga kwakulungana ku busankoga bwa baLawi, nu mubo u mwikalaga bantu bakasilwe mulembe, kubuni lingo kuneiyaninwa ungo sankoga amoneke ku lukita lwa Melkisedeki, nu ta ku lukita lwa Haruni? 12 Kubuno, busankoga bubo ndi bwagaluka, kasi mulembe nugo nti watunganana kugaluka. 13 Kubuno, wozo ukutekulwa ku bitondo bibino eli wa kingo kilongo, nu takuli muntu wa kilongo kikyo wakitile mulimo ku kayulo. 14 Kubuno buligo buno Mukota weitu atukile mu Yuda, kilongo kitatekwidwe na Musa ku kitondo kya busankoga.
15 Bubo buligo nunse lingo, ndi kwamoneka ungo sankoga ku lukita lwa Melkisedeki, 16 wabikilwe, ta ku mulembe w'ikakizio lya mubili, tondo ku magala ma kalamo katanakuzinda, 17 kubuno alongekedwe bunee:
“Uwe uli sankoga utanakuzinda, ku lukita lwa Melkisedeki.” a
18 Kuli kutikibwa kw'ikakizio itangi, ku kabamba ka mutambo walyo nu wa kutaswaga kwalyo, 19 kubuno mulembe wozo tawasililizizie kena, tondo walusizie kilemanizio kisoga nunse, kubuno mukyo tukukunda ku Kalaga.
20 Nu bubo tabwabede geteli kulumbila. 21 Kubuno baLawi babede basankoga geteli kulumbila; tondo Yesu abede sankoga gamozi na kulumbila na wozo wamubwide bunee:
“Mukota alumbide, nu ntakeibezia,
‘Uwe uli sankoga utanakuzinda, ku lukita lwa Melkisedeki.’”
22 Nu ku kitondo kikino, Yesu eli mwima w'idagano isoga nunse.
23 Kwabede basankoga beingi: kubuno bakuaga nu tabavwamine kwikala mu mulimo bindi binsania. 24 Tondo We, akwikalaga ku nkiko na nkiko, eli na busankoga butanagaluka.
25 Ku bubo lingo anavwama konia nunse babo bakukunda ku Kalaga mweli, kubuno eli mulami bindi binsania buno abasegele.
26 Umpanga bwatutananinne buno tube na sankoga munene anga We, wasililila, uteli na bwagi, aba uteli n'itondoki, wasakamizibwe kutinga meigulu. 27 Nteli anga babo bango basankoga banene. Ntakwiyanina kukasana kisansa na busi na busi, kulinga ku bwagi bwage wenyene nu kusila ku bwagi bwa bango bantu, tondo akitile kisansa limbizi limozi tugu geikasenne wenyene. 28 Kubuno mulembe ukubikaga bantu batamba buno babe basankoga banene, nu kulumbila kwabede kumbusa kwa mulembe kwabikile Mwana wasililila ku nkiko na nkiko.