6
1 Ku bubuno, tusige bitondo bitangi bya meigisia ma Kristo, twidangazi ku bitondo byasililila, geteli kubika lingo kibanza kya kwiyania ku makitilo makulusia lukuo nu kya bukatizio ku Kalaga, 2 nu kya meigisia ma lututiko, nu kya kubikwa maboko, nu ky'iyukilo lya bakuzi nu kya lusungio lutanakuzinda. 3 Twakite bubo ndi Kalaga atukasa bwangato. 4 Kubuno babo bakasilwe kyengi, babo basondile lukaso lwa mwigulu, babo bagomezie na Muuza Wasililila, 5 babo basondile idagi isoga lya Kalaga nu magala ma nkiko zikavwa, 6 ndi bagoa nti tabwakulungana lingo aba kwigonga, kubuno bakutaka lingo Mwana wa Kalaga bobenyene nu kumwitia na nsoni lwabusio lwa bantu.
7 Kubuno ndi nsi zikunua mazi ma mbula zikuloka mambizi meingi gantata gazo, nu kwasia bisugu bisoga bya kulia ku babo bakubilima, zikukaswa mponga ku Kalaga, 8 tondo ndi zasia mikele nu miti za binkelenkele, nti zasombwa nu nti zise bwigi na kuswililwa, nu kuzinda kwazo kuli kugisibwa.
9 Batundwa bane, aba ndi tukutenda bubo, tukukatizia bitondo bisoga nunse ku kabamba keinyu, nu bili na lonio. 10 Kubuno Kalaga eisanana nu nteibilile mulimo weinyu nu lutundo lumwalolesizie ku izina lyage, kubuno mwakitide basililila busoga aaba nu kano kaluma muki mwabakitila. 11 Nu beiswe tukutunda nunse muntu na muntu wa kumuli alolesie kako komanizia mu kulanga kilemanizio aaba nu kuzinda, 12 buno tamube basosu nunse, tondo muyange babo bapieni b'idagano ku bukatizio nu ku nkiki.
Idagano lya Kalaga Lyalinda
13 Gakitile Kalaga idagano lyage ku Abrahamu, ku buno ntavwamine kulumbila mu ungo wamutinga, eidumbide We wenyene, 14 nu abwide bunee: “Lebelebe, nakukase mponga nu natalikile kibuti kyobe.” a 15 Nu ku kwikalila kwa Abrahamu, amonine lilyo idagano. 16 Kubuno bantu bakulumbila mu wozo uli munene kubatinga, nu kilumbilo kili bukasia nu kikusila myango insania. 17 Kubuno Kalaga atundile kulolesia bwasibwasi ku bapieni b'idagano lyage buno lwango lwage lutanagaluka, abalumbide, 18 ku bitondo bibili bitanagaluka, nu mubyo Kalaga ntanavwama kweka buza. Ububo tube na magala malinda, iswe beli n'itinino limozi, kukokomezia kilemanizio kitwabikidwe. 19 Kilemanizio kikyo, tuli nakyo anga nanga za mutima, kili bulonge bukata nu kyalinda. Kikwingila aaba nu ku Kiziki Kyasililila Nunse lisa lya nsulu, 20 kuko u kwingide Yesu lwabusio ku kabamba keitu, abede Sankoga Munene utanakuzinda anga lukita lwa Melkisedeki.